Ալիևը ձեռնոց է նետում Ռուսաստանին՝ Բաքվում ցուցադրելով իբր «Իսկանդեր-Մ»–ի հրթիռ

Այսօր Բաքվում բացվել է Արցախյան վերջին պատերազմում թշնամու կողմից ոչնչացված հայկական տեխնիկան՝ ձեռք բերված ավարը։ Բացմանը ներկա է եղել նաև երկրի նախագահ Իլհամ Ալիևը։

Ալիևը եղել է նաև իբր Շուշիում պայթած ռուսական «Իսկանդեր» համալիրի հրթիռի մնացորդները ցուցադրող տաղավարի մոտ, թեև ՌԴ–ն և Հայաստանը չեն հաստատել Շուշիի վրա կրակելը, իսկ ՌԴ ՊՆ–ն, դեռ ավելին, հերքել է, որ ընդհանրապես այն կիրառվել է։

Այստեղ ուշագրավ է, որ ցուցանակների վրա գրված է ոչ թե «Իսկանդեր-Է», այլ «Իսկանդեր-Մ»։ Նշենք, որ Հայաստանի ԶՈՒ սպառազինության մեջ կա միայն «Իսկանդերի»՝ մարտավարատեխնիկական բնութագրով ավելի թեթև տեսակ համարվող «Իսկանդեր-Է»–ն, իսկ «Իսկանդեր-Մ» համալիրից ունի միայն ՌԴ-ն։

Այսպիսով՝ Ալիևը քայլ առ քայլ, Թուրքիայի ակներև դրդմամբ, առճակատման է գնում Ռուսաստանի հետ՝ մեղադրելով նրան պատերազմում «Իսկանդեր-Մ» կիրառելու մեջ։

Եթե հաշվի առնենք Ադրբեջանում պետության ակնհայտ դրդմամբ տեղի ունեցող հակառուսական արշավը, ապա պարզ է դառնում, որ Ադրբեջանն ամեն ինչ անելու է ՌԴ-ին տարածաշրջանից դուրս մղելու, Արցախին տիրանալու և հայկական այդ հողերում հայկական հետքը մեկընդմիշտ վերացնելու համար։