Անկարան հերքել է Սիրիայի անցակետերի վերաբերյալ Մոսկվայի հետ համաձայնության մասին տեղեկությունները

Թուրքական Anadolu պետական լրատվական գործակալությունը մարտի 26-ին հերքել է, թե Ռուսաստանի և Թուրքիայի միջև համաձայնություն է ձեռք բերվել Սիրիայի հյուսիսում Բաշար Ասադի կառավարական ուժերի և, այսպես կոչված, Սիրիայի զինված ընդդիմության կողմից վերահսկվող տարածքների միջև անցակետեր բացելու մասին:

Ավելի վաղ որոշ ռուսական ԶԼՄ-ներ, վկայակոչելով Ռուսաստանի պաշտպանության նախարարությունը, լուրեր էին տարածել այն մասին, որ Մոսկվան և Անկարան պայմանավորվել են, մարդասիրական նկատառումներով, հեշտացնել մարդկանց տեղաշարժը սիրիական Իդլիբ նահանգով և Հալեպ քաղաքով: Սակայն թուրքական անվտանգության աղբյուրները Anadolu-ին հայտնել են, որ նման բան չկա։

Սիրիայում հակամարտող կողմերի հաշտեցման ռուսական կենտրոնի ղեկավարի տեղակալ Ալեքսանդր Կարպովը հայտնել էր, որ այս թեմայի վերաբերյալ բանակցություններ են ընթանում։