Լրագրողներն ու դիտորդները հերքել են իրենց աշխատանքի խոչընդոտման մասին տեղեկությունները. ԿԸՀ

 Քիչ առաջ սահմանադրական հանրաքվեի քվեարկության ընթացքում ստացված դիմում-բողոքների, ԶԼՄ հաղորդումների և դրանց քննարկման արդյունքների վերաբերյալ տեղեկություններ հաղորդեց ՀՀ հանրաքվեի կենտրոնական հանձնաժողովի անդամ Նունե Հովհաննիսյանը:

 Նա նշեց, որ երեք գրավոր դիմում է ստացվել, որոնցից առաջինի դեպքում անդրադարձ է եղել հանրաքվեի բովանդակային մասին, մյուս երկու դիմումները ներկայացվել են մինչև 18:00-ն՝ 15 րոպեի ընթացքում: Հովհաննիսյանի խոսքով՝ երկու դիմում է ստացվել տեղական հասարակական կազմակերպություններից:

«Մեկը` Asparez.am լրատվական կայքի լրագրող Մելինե Ավագյանից, մյուսը` մի շարք դիտորդների կողմից: Դիմումները վերաբերում են նրան, որ խոչընդոտել են դիտորդների և ԶԼՄ ներկայացուցիչների աշխատանքը: ԿԸՀ-ն ձեռնարկեց արագ արձագանքման միջոցառում, և անմիջապես զանգահարեցինք տեղամասային հանձնաժողովների ներկայացուցիչներին, և կապ հաստատվեց հենց նշված դիտորդների հետ»,- ասաց Հովհաննիսյանը՝ հավելելով, որ հետո արդեն Մելինե Ավագյանից հաղորդագրություն է ստացվել, որ իրականում չեն խախտվել իր իրավունքները: «Մյուսների հետ կապված` զրուցել ենք դիտորդների և լրագրողների հետ, բոլորը հերքել են դիմումով ներկայացված այն փաստական հանգամանքը, որ տեղամասային հանձնաժողովներն արգելում են դիտորդներին իրականացնել իրենց իրավունքները և առաքելությունը»,- ասաց Նունե Հովհաննիսյանը:

Նա նշեց նաև, որ ներկայացված երկու դիմումներն ուղարկվելու են ՀՀ գլխավոր դատախազություն, քանի որ այնտեղ խոսվում է դիտորդների իրավունքների խախտման մասին: Հովհաննիսյանը հայտնեց նաև, որ դիմումները կստանան համապատասխան ընթացք, և արդյունքների մասին կհաղորդվի լրացուցիչ: