Արցախում մշակութային նոր ցեղասպանությունը կանխելու համար ԱՀ ԿԳՄՍՆ-ն դիմել է միջազգային կազմակերպություններին

Արցախի ԿԳՄՍ նախարարությունը բարձրացրել է մշակութային ցեղասպանության հարցը: Նախարարությունից դիմել են միջազգային կառույցներին, որպեսզի հնարավոր բոլոր ջանքերը գործադրեն և գործնական քայլեր ձեռնարկեն Ադրբեջանի հանրապետության նախագահի մակարդակով հրահանգված Արցախի տարածքում մշակութային նոր ցեղասպանությունը կանխելու ուղղությամբ:

«Դեռևս խորհրդային տարիներից Ադրբեջանի իշխանությունների պետական քաղաքականության առանցքային մաս էր դարձել հայկական հուշարձանների մի կողմից անխնա ոչնչացումը, իսկ մյուս կողմից՝ յուրացումը: Առկա են բազմաթիվ փաստեր առ այն, թե ինչպես են անխնա ոչնչացման ենթարկվել հատկապես հայերեն արձանագրություններով հուշարձանները՝ եկեղեցիները, վանքերը, խաչքարերը, որոնք ակնհայտորեն մատնանշում են հայ ժողովրդին պատկանելիությունը:

Կոչ ենք հղում համամարդկային քաղաքակրթության ճակատագրով մտահոգ միջազգային բոլոր կազմակերպույթուններին՝ հնարավոր բոլոր ջանքերը գործադրել և գործնական քայլեր ձեռնարկել Ադրբեջանի հանրապետության նախագահի մակարդակով հրահանգված Արցախի տարածքում մշակութային նոր ցեղասպանությունը կանխելու ուղղությամբ», - նշված է հայտարարության մեջ։