Ռուսաստանը չպետք է թույլ տա, որ Թուրքիան խաբի իրեն. Զատուլինը հիշեցրել է Պուտինի խոսքերը

Կովկասում Ռուսաստանի քաղաքականությունը հաշվի է առնում Օսմանյան կայսրությունում Հայոց ցեղասպանության հետ կապված պատմական հիշողությունը: Այս մասին հայտարարել է ԱՊՀ գործերի, եվրասիական ինտեգրման և ՌԴ Պետդումայի հայրենակիցների հետ կապերի հանձնաժողովի նախագահի առաջին տեղակալ, ԱՊՀ երկրների ինստիտուտի ղեկավար Կոնստանտին Զատուլինը Մոսկվայում անցկացված «Ցեղասպանությունը և առաջին համաշխարհային պատերազմը. միջազգային պայմանագրեր, պատմական զուգահեռներ» խորհրդաժողովում:

Միջոցառումը կազմակերպել էր Ռուսաստանի հայերի միությունը`կապված բոլշևիկների և քեմալական Թուրքիայի միջև կնքված՝ Մոսկվայի պայմանագրի 100-ամյակի հետ:

Զատուլինը հիշեցրել է Ռուսաստանի նախագահ Վլադիմիր Պուտինի սկզբունքային դիրքորոշումը հայ ժողովրդի պատմական հիշողության հարցում: 2015-ի ապրիլի 24-ին Ռուսաստանի ղեկավարը ելույթ էր ունեցել Ծիծեռնակաբերդի հուշահամալիրում, որտեղ հստակ ներկայացրել էր 20-րդ դարի առաջին ցեղասպանության վերաբերյալ Ռուսաստանի տեսակետը:

«Ես հիշում եմ, թե այդ ժամանակ ինչքան հորդոր կար՝ չգնալ Երևան, չվատացնել հարաբերությունները Թուրքիայի հետ: Այնուամենայնիվ, Ռուսաստանի նախագահը նախընտրեց գնալ և ասել ամեն ինչ այնպես, ինչպես իրականում էր: Եվ հիմա՝ Ղարաբաղում տեղի ունեցած իրադարձությունների ժամանակ, մեկնաբանություն տալով, Պուտինը բացատրել է, թե ինչու է ինքը դեմ արտահայտվում թուրք խաղաղապահներին Ղարաբաղյան հակամարտության գոտի ուղարկելուն: Ռուսաստանի նախագահի այս դիրքորոշումն արժանի է բոլոր տեսակի աջակցության»,- նշել է Զատուլինը:

Նրա կարծիքով՝ Ռուսաստանը ոչ մի դեպքում չպետք է խաբվի Թուրքիայից հնչող քաղցր ելույթներով։ Ըստ Զատուլինի՝ պետք է առերեսվել ճշմարտության հետ և թույլ չտալ, որ «քեզ գցեն»:

«Մենք լսել ենք, այսպես կոչված, Գոլոդոմորի մասին, մենք Լեռնային Ղարաբաղի իրադարձությունների ժամանակ լսել ենք Խոջալուի մասին: Բայց ցեղասպանությունն ունի համակարգային սահմանումներ: Դրանք վավերագրական հաստատված գործողություններ են, որոշումներ ամբողջ ժողովրդի ոչնչացման մասին: Գոլոդոմորի կամ Խոջալուի դեպքում ոչ մի նման բան չկար» - ասել է Զատուլինը: