«Հայաստան» համահայկական հիմնադրամի միջոցով Հայաստան է հասել ավելի քան 184 տոննա մարդասիրական օգնություն

Պատերազմի առաջին օրերից սփյուռքի ջանքերով եւ «Հայաստան» համահայկական հիմնադրամի օժանդակությամբ սփյուռքի տարբեր կենտրոններից Հայաստան է հասնում մեծածավալ մարդասիրական օգնություն։ Առ այսօր Հայաստան է հասել շուրջ 184345 կգ (ավելի քան 184 տոննա) մարդասիրական տարաբնույթ օգնություն:

Ստացվել են բժշկական ժամանակակից սարքավորումներ, առաջին բուժօգնության վիրակապեր, վերքերի մշակման եւ մաշկի վերականգնման բուժական միջոցներ, ձմեռային տաք արտահագուստ եւ կոշիկներ, քնապարկեր, վրաններ, մահճակալներ, սնունդ, նվերների փաթեթներ արցախցի դպրոցականների համար եւ այլն:

Պատերազմի ընթացքում՝ հոկտեմբերի 10-ից սկսած, սփյուռքում բնակվող հայերի եւ տարբեր համայնքներում գործող հայկական կազմակերպությունների ուժերով ԱՄՆ-ից եւ Եվրոպայից ընդհանուր առմամբ հավաքվել եւ համահայկական հիմնադրամի ջանքերով Հայաստան է հասել շուրջ 87941 կգ հումանիտար օգնություն։ Լոս Անջելեսից բեռներ են ստացվել հոկտեմբերի 10-ին, 15-ին, 16-ին, 19-ին, 22-ին, 30-ին եւ 31-ին, որոնց ընդհանուր քաշը կազմել է շուրջ 61549 կգ, Նիդեռլանդներից հոկտեմբերի 11-ին եւ 12-ին՝ 10415 կգ։ Հայաստան ժամանել են նաեւ 2 ինքնաթիռներ՝ Ֆրանսիայից եւ Բելգիայից հոկտեմբերի 23-ին եւ 26-ին համապատասխանաբար, որոնք տեղ են հասցրել Եվրոպայի տարբեր հայ համայնքներից հավաքված մոտ 15977 կգ հումանիտար օգնություն։

Պատերազմական գործողությունների ընթացքում ստացված մարդասիրական բեռները արտակարգ դրության պայմաններում շահառուններին արագ հասցնելու նպատակով ստացած օգնությունը Հիմնադրամը ստանալուն պես զիջել է Արտակարգ իրավիճակների, Առողջապահության եւ Պաշտպանության նախարարություններին, որը հնարավորություն է տվել ստացված մարդասիրական օգնությունը առանց օր կորցնելու անմիջապես ուղղել ծառացած կարիքների ապահովմանը։

Պատերազմի ավարտից հետո եւս ՀՀՀ ջանքերով Հայաստան է հասել եւ բաշխվել 33389 կգ հումանիտար օգնություն։ Այս շրջանում օգնության մեծ մասը ժամանել է Լոս Անջելեսից, ինչպես նաեւ Ֆրանսիայից: Հումանիտար բեռները Հայաստան են հասել նոյեմբերի 19, 20, դեկտեմբերի 6-ին, 7-ին , 14-ին, 18-ին ,21-ին, 24-ին, 26-ին, 28-ին ,29-ին եւ 2021 թվականի հունվարի 14-ին։

Այս շրջանում ստացած օգնությունը բաշխվել է մի շարք առողջապահական եւ համայնքային կառույցների, այն է՝ Քանաքեռ–Զեյթուն ԲԿ եւ ծննդատուն, պրոֆ․ Ռ․Օ․ Յոլյանի անվան Արյունաբանական կենտրոն, Մուրացանի զինվորական հոսպիտալ, Մարտունի ԲԿ, Կապանի ԲԿ, Հայրենիքի պաշտպանի վերականգնողական կենտրոն, Նոյեմբերյան ԲԿ, Սուրբ Աստվածամայր ԲԿ, Վարդենիսի հիվանդանոց, Էրեբունի ԲԿ, Գրիգոր Լուսավորիչ ԲԿ, Գորիսի ԲԿ, օգնություն է տրամադրվել Արցախի առողջապահության նախարարությանը։ Որոշակի քանակի օգնություն` հիմնականում ձմեռային տաք արտահագուստ եւ կոշիկներ, շահառուներին փոխանցվել է Տավուշի, Արարատի եւ Գեղարքունիքի մարզպետարանների միջոցով:

Մարդասիրական բեռները շարունակում են ժամանել, եւ այս պահի դրությամբ պահեստավորված է հունվարի 22-ից փետրվարի 4-ը  Լոս Անջելեսից ստացվաց 63015 կգ բեռ։ Դրանք դեռեւս գտնվում են մաքսազերծման եւ դասակարգման գործընթացում եւ շուտով կհասնեն իրենց հասցեատերերին։