Թրամփն ընդունել է պարտությունը և դադարեցնում է պայքարը

ԱՄՆ նախագահ Դոնալդ Թրամփը հայտարարել է, որ իր շտաբն օգտագործում է յուրաքանչյուր օրինական հնարավորություն նախագահական ընտրությունների արդյունքները վիճարկելու համար, բայց հիմա եկել է հաշտվելու ժամանակը: Նա խոստանել է կենտրոնանալ իշխանության սահուն փոխանցումն նորընտիր նախագահ Ջո Բայդենի վարչակազմին ապահովելու վրա:

«Մենք պարզապես լարված ընտրությունների միջով անցանք, և հույզերը շատ մեծ են: Բայց հիմա մենք պետք է սառենք և վերականգնենք հանգստությունը»,- ասել է Թրամփը Twitter-ում հեռարձակված ելույթում:

Նա հայտարարել է, որ, չնայած «ամերիկյան ժողովրդավարությունը պաշտպանելու»՝ իր շտաբի օրինական ջանքերին, Կոնգրեսը վավերացրել է ընտրությունների արդյունքները, իսկ հունվարի 20-ին նոր վարչակազմը կգա իշխանության:

«Այժմ իմ ուշադրությունը կենտրոնացած է իշխանության սահուն, կանոնավոր անցումն ապահովելու վրա: Այս պահը պահանջում է ապաքինում և հաշտություն»,- հավելել է Թրամփը:

Նա նաև խոստացել է իր աջակիցներին, որ իրենց «անհավատալի ճանապարհորդությունը դեռ նոր է սկսվում», և նրանց անվանել է «հրաշալի»:

«Ես ուզում եմ, որ դուք իմանաք, որ մեր անհավատալի ճանապարհորդությունը նոր է սկսվում: Շնորհակալություն: Աստված օրհնի ձեզ: Եվ Աստված օրհնի Ամերիկան»,- ասել է Թրամփը: