Արցախցիներին աշխատանքով ապահովելու հեռանկարով միջոցառում հաստատեց կառավարությունը

Պատերազմի հետևանքով տեղահանված և ՀՀ-ում գտնվող՝ Արցախի Հանրապետության գործազուրկ քաղաքացիներին աշխատանքային փորձ ձեռք բերելու և աշխատաշուկայում առավել մրցունակ դառնալու նպատակով կառավարությունն այսօր ընդունեց միջոցառում՝ հայտնում է Yerkir.am-ը։

Աշխատանքի և սոցիալական հարցերի նախարար Մեսրոպ Առաքելյանը,  ներկայացնելով նախագիծը, ասաց, որ այս միջոցառման շրջանակում շահառու է համարվում Հայաստանի Հանրապետության կառավարության 2020 թվականի նոյեմբերի 21-ի N 1820-L որոշման շահառու հանդիսացող գործազուրկ անձը։

Այս միջոցառման շրջանակում գործատու է համարվում այն իրավաբանական անձը կամ անհատ ձեռնարկատերը, որը շահառուի հետ կնքում է աշխատանքային պայմանագիր։

Գործազուրկ անձը մեկ անգամ կարող է ընդգրկվել միջոցառման մեջ` 3 ամիս տևողությամբ։

Միջոցառման շրջանակներում վճարվում է՝

գործազուրկ անձին ամսական աշխատավարձ` 100 հազ․ դրամի չափով,

գործատուին գումար` գործազուրկ անձի աշխատավարձից հաշվարկվող եկամտային հարկը, դրոշմանիշային վճարը և օրենքով սահմանված դեպքերում` նպատակային սոցիալական վճարը փոխհատուցելու համար,

գործատուի մոտ աշխատանքային փորձի ձեռքբերման գործընթացը կազմակերպող մասնագետին ամսական կտրվածքով վճարվում է գումար` 34 հազ․ դրամի չափով:

6․ Միջոցառման շրջանակներում որպես աջակցություն տրամադրվող փոխհատուցման ենթակա միջոցները փոխանցվում են գործատուի բանկային հաշվին։

7․ Աջակցության տրամադրումը դադարեցվում է, եթե լուծվել է շահառուի հետ կնքված աշխատանքային պայմանագիրը։

«Միջոցառումը ենթադրում է գործազուրկ անձանց հնարավորություն տալ գործատուների մոտ անցնել մինչեւ երեք ամիս ժամկետով  պրակտիկա, որի դիմաց այդ քաղաքացիները կվարձատրվեն 100 հազար դրամի չափով: Միաժամանակ գործատուի մոտ աշխատանքային փորձի ձեռքբերման գործընթացը կազմակերպող անձին կտրվի աջակցություն 34 հազար դրամի չափով: Միջոցառման շահառուները կարող են դիմել զբաղվածության գործակալություններ»,-պարզաբանեց նախարարը:

Միջոցառման շրջանակներում որպես աջակցություն տրամադրվող փոխհատուցման ենթակա միջոցները փոխանցվում են գործատուի բանկային հաշվին։

Աջակցության տրամադրումը դադարեցվում է, եթե լուծվել է շահառուի հետ կնքված աշխատանքային պայմանագիրը։