Ամանորյա միջոցառումների 100 մլն դրամը կտրամադրվի Ստեփանակերտի վերականգնմանը

Այսօր Երևանի ավագանու որոշմամբ փոփոխություն կատարվեց ավագանու 2019 թվականի դեկտեմբերի 25-ի N186-Ն որոշման մեջ:

Փոփոխության համաձայն՝ Երևան քաղաքի 2020 թվականի բյուջեով՝ ամանորյա միջոցառումների իրականացման նպատակով նախատեսված 100 մլն դրամ գումարը վերաբաշխվեց պահուստային ֆոնդի վարչական մաս: Նախատեսված գումարն  ուղղվելու է Արցախի Հանրապետության մայրաքաղաք Ստեփանակերտում պատերազմի հետևանքով վնասված քաղաքացիական ենթակառուցվածքների և օբյեկտների վերականգնողական կապիտալ աշխատանքներ իրականացնելուն:

Ավելի վաղ Երեւանի քաղաքապետ Հայկ Մարությանը այս կապակցությամբ «Ֆեյսբուք»-ի իր էջում գրել էր․

«Երեւանը շարունակում է օգնել Ստեփանակերտին՝ շուտափույթ վերականգնման հարցում։

Երևանի ավագանին քիչ առաջ միաձայն որոշումով բյուջեից եւս 100 միլիոն հատկացրեց Ստեփանակերտին։

Այդ նպատակով, 2020-ի բյուջեով ամանորյա տոնակատարությունների, քաղաքի արտաքին ձեւավորման եւ այլ տոնական միջոցառումների իրականացման համար նախատեսված 100 մլն դրամ գումարը վերաբաշխվեց եւ կուղղվի Արցախի Հանրապետության մայրաքաղաք Ստեփանակերտի թիրախավորման հետևանքով վնասված քաղաքացիական ենթակառուցվածքների և օբյեկտների վերականգնողական կապիտալ աշխատանքների իրականացմանը»։