Ռուսաստանի ԱԳՆ–ն մեկնաբանել է Ադրբեջանի դեսպանի լկտի խոսքերը խոցված ուղղաթիռի մասին

Ռուսաստանի արտգործնախարարությունը «մեծ սխալ» է որակել Ադրբեջանի դեսպան Փոլադ Բյուլբյուլօղլուի հայտարարությունը ռուսական Մի-24 ուղղաթիռի կործանման մասին:

Դեսպանը, մեկնաբանելով աղետը, կատարվածը ողբերգական պատահար է համարել և նշել է, թե պատերազմում ամեն ինչ կարող է պատահել: «Պատերազմում, ինչպես պատերազմում, ամեն ինչ կարող է պատահել»,- ասել էր դեսպանը:

«Դա մեծ սխալ է: Եթե Ռուսաստանը դավաներ «Պատերազմում, ինչպես պատերազմում» սկզբունքը, ապա պատասխանը ջախջախիչ կլիներ: Մյուս կողմից՝ Մոսկվան ընդունել է Բաքվի խոսքերը մեղավորության ընդունման և ներողություն խնդրելու մասին»,- հաղորդում է «ՌԻԱ Նովոստի»-ն՝ ռուսական գերատեսչության հղումով:

Ռուսական կողմը սպասում է պատասխանատուների հետաքննությանը և պատժին, ինչպես որ հայտարարել էր Ադրբեջանի նախագահ Իլհամ Ալիևը:

Հոկտեմբերի 9-ին ադրբեջանական զինուժը Հայաստանի տարածքում խոցել էր ռուսական Մի-24 ուղղաթիռը: Ուղղաթիռի կործանման մասին տեղեկությունը հաստատել էր ՌԴ ՊՆ-ն: Անձնակազմի երկու անդամ զոհվել էր, երրորդը միջին ծանրության վնասվածքներով տեղափոխվել էր օդանավակայան: Ռուսաստանի արտգործնախարարությունը դրական էր գնահատել այն փաստը, որ Բաքուն անմիջապես ընդունել է իր մեղքը։