Կարմիր խաչը պատրաստ է միջնորդել խոցված ուղղաթիռի անձնակազմի զոհված անդամներին հայկական կողմին հանձնելուն

Երեկ` ժամը 13.45-ի սահմաններում, ուսումնավարժական թռիչքի ժամանակ ադրբեջանական ԶՈՒ-ի կողմից հրադադարի ռեժիմի խախտման արդյունքում խոցված ԼՂՀ ՌՕՈւ ՄԻ-24 ուղղաթիռի անձնակազմի զոհված 3 անդամների մարմինները չի հաջողվում դուրս բերել:

Թե արդյո՞ք հայկական կողմը դիմել է Կարմիր խաչին` նրանց միջնորդությամբ զոհվածների մարմինները դուրս բերելու խնդրանքով, Yerkir.am-ի հետ զրույցում Կարմիր խաչի միջազգային կոմիտեի հայաստանյան գրասենյակի հաղորդակցման ծրագրերի ղեկավար Զառա Ամատունին պատասխանեց. «Կարմիր խաչը նորից հաստատում է, որ պատրաստ է իր` անկախ միջնորդի ծառայությունները առաջարկել` ստանալով համապատասխան պաշտոնական հայտերը հակամարտության կողմերից: Մենք հակամարտության կողմերի ղեկավարությունների հետ երկխոսության մեջ ենք: Իսկ ինչ վերաբերում է պաշտոնական դիմումին, ապա դեռևս չեմ կարող հաստատել կամ հերքել` ստացվե՞լ է, թե՞ ոչ»: