Թուրքիան փորձում է ահաբեկել նաև Արևմտյան Հայաստանի հայերին․ թուրքական և ադրբեջանական դրոշներ՝ Դիարբեքիրի պարիսպներին (լուսանկարներ)

Դիարբեքիր քաղաքի պատմական պարիսպների վրա մեծ չափի թուրքական և ադրբեջանական դրոշներ են կախվել։ Նպատակը տեղի հայերին ահաբեկելը և համայն հայությանն ուղերձ հղելն է։ Այդ մասին հայտնում է Akunq.net-ը։

Դրոշները կախվել են այսօր, տեղի իշխանությունների գիտությամբ և թույլտվությամբ։ Ինչպես հայտնի է, ներկայում Դիարբեքիրը պաշտոնապես քաղաքապետ չունի։ Այդ գործառույթներն իրականացնում են հոգաբարձուները, քանի որ այս տարվա մարտին Դիարբեքիրի քուրդ քաղաքապետ Ադնան Սելչուք Մըզրաքլըն, որը քրդամետ Ժողովուրդների դեմոկրատական կուսակցության (HDP) անդամ է, ձերբակալվել էր՝ «զինված ահաբեկչական կազմակերպությանն անդամակցելու» մեղադրանքով։

Այս ակցիայի նպատակներից մեկն էլ համայն հայությանն ուղերձ հղելն է, քանի որ տեղական իշխանությունները քաջ գիտակցում են Դիարբեքիրի և շրջակա տարածքների հայկական լինելու փաստը։

Լուսանկարները մեզ փոխանցած դիարբեքիրցի հայը հասկանալի պատճառներով խնդրեց, որ իր անունը չհրապարակվի։

Մելինե Անումյանը

Akunq.net