Վրաստանում դատարաններին առաջարկվել է հեռավար աշխատել

Վրաստանի արդարադատության բարձրագույն խորհուրդն առաջարկել է կորոնավիրուսի համավարակի պատճառով դատական նիստերն անցկացնել հեռավար կարգով: Այս մասին ասել է խորհրդի քարտուղար Գեորգի Միքաուտաձեն. գրում է newsgeorgia.ge-ն:

Նա, մասնավորապես, նշել է. «Քանի որ վարակվածների թիվն աճում է, մենք ընդունեցինք առաջարկություններ գործընթացները հեռավար կարգով անցկացնելու վերաբերյալ: Բացի այդ՝ պաշտոնյաները, պայմանավորված իրենց իսկ անվտանգությունից, պետք է հնարավորինս ձեռնպահ մնան դատարանի շենքերում հայտնվելուց, եթե այդպիսի անհրաժեշտություն չկա: Մենք ունենք կայք, որը սպասարկում է քաղաքացիներին, և նրանք կարող են ստանալ իրենց անհրաժեշտ ծառայությունները»:

Հիշեցնենք՝ վերջին մեկ օրվա ընթացքում Վրաստանում հայտնաբերվել է կորոնավիրուսային վարակի 170 նոր դեպք, ապաքինվել է 12 մարդ: Այս պահին COVID կենտրոններում շարունակում է մնալ 1 154 վարակակիր. նրանցից 5-ը գտնվում են ծայրահեղ ծանր, 35-ը` ծանր վիճակում: