Հարավային Կորեան արբանյակային վերլուծության կենտրոն է ստեղծել ԿԺԴՀ-ի իրադրության ուսումնասիրման նպատակով

Կորեայի Հանրապետության միավորման նախարարությանը կից ընթացիկ տարվա երկրորդ կեսից սկսել է գործել Արբանյակային տեղեկատվության վերլուծության կենտրոնը: Այս մասին հայտարարություն է տարածել Հարավային Կորեայի գերատեսչությունը, որը համակարգում է հարևան ԿԺԴՀ-ի հետ հարաբերությունները. հայտնում է ՏԱՍՍ-ը:

Ըստ գերատեսչության՝ նախարարությանը կից այդ կենտրոնը ստեղծվել էր ավելի շուտ, բայց լիարժեք սկսել է աշխատել միայն երկրորդ կիսամյակում: Այդ բաժնի պարտականությունները ներառում է արբանյակային այն լուսանկարների մանրամասն վերլուծությունը, որոնք տրամադրում է Կորեայի օդատիեզերական հետազոտությունների ինստիտուտը և որոնք վերաբերում են Հյուսիսային Կորեայի տնտեսությանն ու հասարակական ոլորտին:

Միավորման նախարարությունն ընդգծել է նաև, որ ԿԺԴՀ-ի իրադրության ուսումնասիրությունը սոսկ վիճակագրական տվյալների հիման վրա խիստ սահմանափակ է, մինչդեռ արբանյակային լուսանկարները հնարավորություն են տալիս ստանալու առավել մանրամասն տեղեկատվություն: