Թուրքիան դատապարտել է Երուսաղեմում դեսպանատուն բացելու՝ Կոսովոյի որոշումը

Թուրքիայի արտաքին գործերի նախարարությունը մեղադրել է ինքնահռչակ Կոսովոյին միջազգային իրավունքի խախտման մեջ`Երուսաղեմում դեսպանություն բացելու՝ նրա որոշման կապակցությամբ: Գերատեսչությունն այդ մասին հաղորդագրություն է տարածել:

Հայտարարությունում, մասնավորապես, նշվում է. «Հիասթափեցնող է այն, որ Կոսովոյի իշխանություններն այնպիսի քայլ են քննարկում, որը միջազգային իրավունքի բացահայտ խախտում կլինի»:

Հիշեցնենք՝ օրերս Իսրայելի վարչապետ Բինյամին Նեթանյահուն հայտարարեց, որ Սերբիան իր դեսպանատունը կտեղափոխի Երուսաղեմ մինչև 2021-ի հուլիս ամիսը, իսկ մինչ այդ այնտեղ ներկայացուցչություն կբացի՝ դառնալով Երուսաղեմում դեսպանություն բացող առաջին եվրոպական երկիրը: Կոսովոն, որի հետ Իսրայելը պայմանավորվել է դիվանագիտական հարաբերություններ հաստատել, նույնպես իր դեսպանությունը կտեղակայի Երուսաղեմում: Այս որոշումներն ընդունվել են Միացյալ Նահանգների միջնորդությամբ:

Նշենք՝ Թուրքիան առաջիններից մեկն է, որ ճանաչել է Կոսովոն և մեծ աջակցություն է ցուցաբերում նրա միջազգային ճանաչմանն ուղղված ջանքերին: