Քաշաթաղի շրջանի վարչակազմի ղեկավար Արտյոմ Սարիբեկյանն ազատվել է աշխատանքից

Արցախի Հանրապետության նախագահ Արայիկ Հարությունյանը ֆեյսբուքյան իր էջում հայտնում է, որ պաշտոնական դիրքի չարաշահման պատճառով Քաշաթաղի շրջանի վարչակազմի ղեկավարն ազատվել է աշխատանքից:

Ստորև ներկայացնում ենք ԱՀ նախագահի գրառումը.

«Այսօր Քաշաթաղի շրջանի վարչակազմի ղեկավար Արտյոմ Սարիբեկյանին աշխատանքից ազատելու մասին կառավարության որոշում եմ հաստատել, իսկ պատճառն իմ հանձնարարականին չհետևելն է՝ պաշտոնական դիրքի չարաշահմամբ որդուն իր ենթակայությամբ վարչակազմի աշխատակազմում գործի ընդունելը:Նորից եմ դիմում պետական բարձրաստիճան պաշտոնյաներին. բոլոր հանձնարարականներիս կատարման հարցում լինելու եմ հետևողական, իսկ ձեր խնդիրը Հայրենիքին բարեխղճորեն ծառայելն է միայն: Այլապես միասին աշխատելու եզրեր չեն լինի»: