«Կառավարութեան Հրաժարականէն Ետք Մուտք Գործած Ենք Մութ Փապուղիի Մը Մէջ » Շեշտեց Յ. Բագրատունի

ՀՅԴ Լիբանանի Կեդրոնական կոմիտէի ներկայացուցիչ, երեսփոխան Յակոբ Բագրատունի երէկ «Սաութ քըլ Լըպնան» ռատիոկայանին հետ հարցազրոյցի մը ընթացքին յայտնեց, որ կառավարութեան հրաժարականէն ետք մուտք գործած ենք մութ փապուղիի մը մէջ:

«Նկատի ունենալով կառավարութիւններ կազմելու նախկին փորձառութիւնները, կը նախատեսենք, որ կառավարութեան կազմութիւնը այդքան ալ արագ կարելի չըլլայ կատարել», ըսաւ ան:

Երեսփոխան Բագրատունի յայտնեց, որ կառավարութեան հրաժարականը նոր փուլի շրջագիծին մէջ պէտք է դիտել` նկատի ունենալով, որ անիկա պատահեցաւ Պէյրութի նաւահանգիստի պայթումին պատճառած աղէտէն ետք, յատկապէս ի մտի ունենալով, որ հրաժարեալ վարչապետ Հասսան Տիապի կառավարութիւնը իր կազմութեան օրէն սկսեալ քաղաքական ամբողջական զօրակցութեան չէ արժանացած:

Կառավարութեան կազմութեան առումով, Յ. Բագրատունի յայտնեց, որ ինք արտաքին նախաձեռնութիւններուն չի վստահիր, որովհետեւ անոնք նկատի չեն ունենար լիբանանեան ներքին բարդութիւնները:

Վարչապետի հաւանական թեկնածուի մասին հարցումի մը պատասխանելով` Յ. Բագրատունի յայտնեց, որ քաղաքական ուժերուն մօտ տակաւին յստակ անուն մը չկայ` աւելցնելով, որ ՀՅ Դաշնակցութիւնը իր կարգին տակաւին յստակ պատկերացում չունի, թէ ո՛վ է այն սիւննի անձնաւորութիւնը, որ պատրաստ է կազմելու երկրին նոր կառավարութիւնը:

Յ. Բագրատունի անհաւանական նկատեց Սաատ Հարիրիի կողմէ դարձեալ վարչապետի պաշտօնի ստանձնումը: «Պէյրութի նաւահանգիստի պայթումին ընթացքին մենք Հարիրիի մօտ կը գտնուէինք եւ ան յայտնեց, որ վարչապետի պաշտօնը ստանձնելու նպատակ չունի, որովհետեւ Լիբանանին ներկայացնելիք նորութիւն մը չունի», հաստատեց ան:

Պատասխանելով այն հարցումին, թէ նաւահանգիստի պայթումը ի՞նչ վնասներ պատճառած է Պուրճ Համուտի եւ Մտաուարի շրջաններուն, Յ. Բագրատունի յայտնեց, որ անպաշտօն կերպով վնասներու գնահատում կատարուած է` շրջանի հեղինակութիւններէն: «Պարզուած է, որ քանդումը հսկայական է, ինչպէս նաեւ կան շէնքեր, որոնք բնակիչներուն կեանքին վտանգ կը սպառնան, որովհետեւ փուլ գալու ենթակայ են», եզրափակեց ան:

aztagdaily.com