Դատարանը հետաձգեց Քոչարյանի գույքի վրա կալանքը վերացնելու վերաբերյալ հարցի լուծումը

Երևանի ընդհանուր իրավասության դատարանի Շենգավիթի նստավայրում Աննա Դանիբեկյանը որոշում է կայացրել հետաձգել ՀՀ երկրորդ նախագահ Ռոբերտ Քոչարյանի և 2008-ին Հայաստանի նախագահի աշխատակազմի ղեկավար, Անվտանգության խորհրդի քարտուղար Արմեն Գևորգյանի պաշտպանների միջնորդության լուծումը՝ նրանց գույքի վրա դրված կալանքը վերացնելու վերաբերյալ։

Լսելով դատավարության մասնակիցների դիրքորոշումները, դատավոր Դանիբեկյանը արձանագրել է որ դատարանը հնարավոր չի գտնում առանց համապատասխան գույքի արժեքը որոշելուն լուծել ներկայացված միջնորդությունը, ուստի դատարանը այդ հարցին կանդրադառնա դատաքննության ընթացքում կալանադրված գույքի վերաբերյալ համապատասխան նյութերը հետազոտելուց հետո։

«Անհրաժեշտության դեպքում կարող է քննարկվել մասնագետի ընտրության հարցը, ինչպես նաև փորձաքննության նշանակման հարցը։ Հետևաբար, միջնորդության քննարկումը և լուծումը հետաձգվում է մինչև դատարանի կողմից կալանքի տակ դրված գույքի արժեքը որոշելը»,- ասել է Դանիբեկյանը։

Ավելի վաղ,  Քոչարյանի և Գևորգյանի պաշտպանները հրաժարվեցին դատարանին ներկայացնել Քոչարյանի գույքի արժեքի վերաբերյալ փաստաթղթերը։

Նախորդ դատական նիստում ՀՀ երկրորդ նախագահ Ռոբերտ Քոչարյանի և նախկին փոխվարչապետ Արմեն Գևորգյանի պաշտպանները միջնորդել էին վերացնել նրանց գույքի և բանկային հաշիվների վրա դրված արգելանքը։ Դատավոր Աննա Դանիբեկյանը պաշտպանական կողմից պահանջել էր ամբողջական տեղեկություն տրամադրել արգելանքի տակ գտնվող գույքի և բանկային հաշիվերի վերաբերյալ։