Թուրքիան կդադարեցնի հետազոտական աշխատանքները Միջերկրականի հունական ջրային տարածքներում

Թուրք բարձրաստիճան մի պաշտոնյա հայտարարել է, որ Թուրքիան կդադարեցնի նավթի և գազի հետազոտման աշխատանքները Արևելյան Միջերկրականի վիճելի ջրերում. հայտնում է Associated Press-ը:

Երկրի նախագահ Ռեջեփ Թայիփ Էրդողանը իր օգնականներին հրահանգել է՝ «լինել կառուցողական և դադարեցնել աշխատանքը մի որոշ ժամանակ». այս մասին նշել է նախագահի խոսնակ Իբրահիմ Քալինը՝ CNN Turk- ի հետ զրույցում:

Անցած շաբաթ Թուրքիան հայտարարել էր Oruc Reis և երկու այլ հետազոտական նավերի ուղարկման մասին` մինչև օգոստոսի 2-ը հետախուզական աշխատանքներ իրականացնելու համար՝ հունական կղզիների Ռոդեսի, Կարպաթոսի և Կաստելորիզոյի հարավային ջրերում: Որոշումը սրել էր լարվածությունը հարևան Հունաստանի հետ և քննադատություն առաջացրել ԱՄՆ-ի, Ֆրանսիայի և եվրոպական այլ երկրների կողմից:

«Բոլորը պետք է շարունակեն աշխատել իրենց մայրցամաքային շելֆերի վրա և միասին աշխատեն վիճելի տարածքներում», - ասել է Քալընը: Նա նաև նշեց, որ Հունաստանի հետ երկկողմ հարցերը պետք է լուծվեն երկխոսության միջոցով, և ոչ թե սպառնալիքների միջոցով:

Հունաստանի կառավարության խոսնակ Ստելիոս Պետսասը երկուշաբթի օրը հայտարարել էր, որ Թուրքիան դուրս է բերում այդ տարածքներից ռազմանավերը, հավելելով, որ Աթենքը շարունակում է պատրաստ լինել բանակցություններ վարել Թուրքիայի հետ «միջազգային իրավունքի և բարիդրացիական հարաբերությունների շրջանակներում»:

Իր հերթին, հույն լրագրող Պոլ Անտոնոպուլոսը Twitter- ի իր միկրոբլոգում գրել է, որ Թուրքիան պլանավորում էր մուտք գործել Հունաստանի ծովային տարածք 17 ռազմանավով, բայց վախենալով փախել էր հունական նավատորմի մոբիլիզացումից հետո:

«Էրդողանը պետք է հասկանա, որ գործ ունի Հունաստանի հետ, այլ ոչ թե քանդված Սիրիայի կամ Լիբիայի հետ, որոնց նա կարող է վախեցնել», - գրել է լրագրողը: