Հայկական Երեսփոխանական Պլոքն Ու Նախարար Օհանեան Այցելեցին Թրիփոլիի Միւֆթիին

Հայկական երեսփոխանական պլոքի ներկայացուցիչ, երեսփոխան Յակոբ Բագրատունի, երիտասարդութեան եւ մարմնակրթութեան նախարար Վարդինէ Օհանեան-Գէորգեան եւ երեսփոխաններ Յակոբ Թերզեան ու Ալեքսանտր Մաթոսեան շաբաթ, 18 յուլիսին այցելեցին Թրիփոլիի եւ Հիւսիսային Լիբանանի միւֆթի շէյխ Մոհամետ Իմամի:

Հանդիպումին ներկայ գտնուեցան նաեւ ՀՅԴ Թրիփոլիի «Բերդավայր» կոմիտէի ներկայացուցիչ Վաչէ Հարմանտայեան, ինչպէս նաեւ Թրիփոլիի իսլամական կալուածներու գրասենեակի նախագահ շէյխ Ապտել Ռազզաք Իսլամպուլի:

Հայկական երեսփոխանական պլոքը շնորհաւորեց միւֆթի Իմամը` անոր ստանձնած պաշտօնին համար:

Քննարկուեցան հիւսիսային Լիբանանի կապուած ազգային եւ ընկերային միացեալ հարցեր, ինչպէս նաեւ անդրադարձ կատարուեցաւ հայրենիքին ու քաղաքացիներուն շահերուն համար փոխադարձ գործակցութեան միջոցներուն:

Հայկական երեսփոխանական պլոքը հաստատեց, որ հանդիպումին ընթացքին միւֆթի Իմամ ընդգծած է հիւսիսային Լիբանանը, յատկապէս Թրիփոլին բաղկացնող բոլոր շերտերուն ապահովութիւնը երաշխաւորելու եւ մտահոգութիւնները փարատելու իմաստով Տար Ֆաթուայի ազգային դերակատարութիւնը, մասնաւորաբար Լիբանանի դիմագրաւած այս դժուար պայմաններուն ընթացքին:

«Միւֆթի Իմամ հաստատեց, որ դժուարութիւնները կարելի կ՛ըլլայ դիմակայել ու շրջանցել ընկերային համագործակցութեամբ», նշուեցաւ Հայկական երեսփոխանական պլոքին կողմէ:

aztagdaily.com