Շտուտգարտում անկարգությունների պատճառով 19 ոստիկան է վիրավորվել

Անցյալ գիշեր Շտուտգարտում 400-500 խուլիգաններ անկարգություններ են իրականացրել, ինչի պատճառով վիրավորվել է 19 ոստիկան. այս մասին հայտնում է գերմանական Deutsche Welle-ն՝ վկայակոչելով տեղի փոխոստիկանապետ Թոմաս Բերգերի խոսքերը։

Նշվում է՝ գիշերային անկարգություններից հետո բերման է ենթարկվել 24 մարդ։ Դատախազությունը նրանցից առնվազն 7-ի ձերբակալության հրաման է տվել։

24 բերման ենթարկվածներից 7-ն անչափահասներ են, ևս 7-ը՝ 18-21 տարեկան։ 24-ից 12-ը Գերմանիայի քաղաքացիներ են։

Կեսգիշերից քիչ առաջ ոստիկանները Շլոսգարտեն այգում ստուգման են ենթարկել Գերմանիայի 17-ամյա մի քաղաքացու՝ թմրանյութերին առնչվող հանցագործություն կատարելու կասկածով։ Նրան անմիջապես աջակցել են մոտակայքում գտնվող 200-300 անձինք՝ քարեր ու շշեր նետելով ոստիկանների ուղղությամբ, որից հետո անկարգությունների մասնակիցների թիվը կտրուկ աճել է։

Իրավիճակը վերահսկողության տակ պահելու համար քաղաք են ուղարկվել ողջ դաշնային հողի ոստիկանական ուժերը. արդեն առավոտյան իրավիճակը հանդարտվել է։