Չի կարելի անձանց միջև ֆիզիկական տարածությունն անվանել «սոցիալական հեռավորություն». Ա. Եղիազարյան

Ռազմական փորձագետ Արթուր Եղիազարյանն իր ֆեյսբուքյան էջում գրում է.

«Այն հասարակությունը և այն իշխանությունը, որոնք գիտակցաբար սոցիալական հեռավորություն են ստեղծում հանրության տարբեր սոցիալական խմբերի միջև՝ աշխարհի ամենաայլանդակ հասարակությունն են ու ամենամարդատյաց իշխանությունը։

Սոցիալական հեռավորությունը հարուստի և աղքատի, առողջ աշխատունակ և անառողջ անաշխատունակ մարդու, աշխատանք ունեցողի և գործազուրկի, բուժման համար միջոց ունեցողի և չունեցողի, արժանապատիվ վարձատրություն ստացողի և շահագործվողի, տուն ունեցողի և անտունի, ծնողական խնամք ունեցողի և առանց ծնողական խնամքի մնացածի, պաշտպանվածի և անպաշտպանի (խոցելիի) և այլնի և այլնի միջև անջրպետ տարածությունն է։ Եվ այն որքան մեծ է՝ նշանակում է, որ տվյալ երկրում ու հասարակությունում ինչ որ բան այն չէ։
Հակառակը, սոցիալական հեռավորության բևեռացումը պետք է կրճատել, հնարավորինս նվազագույնի հասցնել, սոցիալական խմբերը մոտեցնել իրար։
Նժդեհը մի լավ վճռակ (աֆորիզմ) ունի. «Սոցիալապես որքան արդար՝ այնքան զորավոր է Հայրենիքը»։ Սա պե՛տք է դարձնել մեր պետության կարգախոսը։

Չի կարելի անձանց միջև ֆիզիկական տարածությունը անվանել «սոցիալական հեռավորություն»։ Ասեք օրինակ՝ 2 մետր տարածություն, ապահով կամ անվտանգ հեռավորություն, երկու ոտնաչափ, տո թեկուզ՝ մեկ գետաձիաչափ, բայց ո՛չ երբեք՝ «սոցիալական հեռավորություն»։
Լավ, ինչքա՞ն կարելի է այս անգրագիտությունը կապկել, թութակել, ինչ է թե՝ առողջապահության համաշխարհային կազմակերպության ինչ որ ձև բռնող մարտնչող տգետ է ասել։ Ու ողջ աշխարհով մեկ, առանց մտածելու՝ շատերը բերանի մաստակ դարձրած կրկնում են։

Սիրելի և հարգելի հայրենակիցներ, կորոնավիրուսից պաշտպանվելու համար՝ ընդամենը պահեք անվտանգ կամ ապահով միջանձնային ֆիզիկական տարածություն կամ հեռավորություն։

#Թագավորը_մերկ_է !!!»։