Հնդկաստանում և Բանգլադեշում «Ամֆան» փոթորիկի հետևանքով զոհերի թիվն անցել է 80-ից

«Ամֆան» ուժգին փոթորկի հասցրած վնասներից հետո Հնդկաստանի արևելքում և Բանգլադեշում մայիսի 22-ին սկսվել են վերականգնողական աշխատանքները. այս մասին է գրում Deutsche Welle-ն, նշելով՝ փոթորիկն իր հետևից թողել է հարյուրավոր կիլոմետրերով քանդված ու ավերված տարածքներ:

Նշվում է՝ հիմնական հարվածը հասել է Հնդկաստանի Արևմտյան Բենգալիա նահանգին: Այստեղ մահերի թիվը կազմում է 72: Փոթորկի հետևանքով հազարավոր տներ քանդվել են, հեղեղվել է տեղի օդանավակայանը, բազմաթիվ տներ մնացել են առանց տանիքի, ավելի քան մեկ միլիոն տնային տնտեսություն՝ առանց էլեկտրականության:

Տեղի իշխանությունների խոսքով՝ փոթորիկից վնասը շատ ավելի մեծ եղավ, քան կորոնավիրուսից:

Բանգլադեշում փոթորիկի հետևանքով 7 մարդ է զոհվել, ավերվել են հազարավոր ֆերմաներ: Փոթորիկի արագությունը հասել է 200 կմ/ժ:

Հնդկաստանում տարհանվել է ավելի քան 600 հազար, Բանգլադեշում՝ 2.6 միլիոն մարդ: Այդ տարածքներում 1999 թվականից այս կողմ նման ուժգնության փոթորիկ չէր եղել: