Մեզանից պահանջում են ապացուցել, որ վարչապետի մերձավորները կապ ունեն մաքսանենգության հետ․ Արթուր Դանիելյան

Այս աճպարարության հիմնական նպատակն էր հանրության վրա դնել վարչապետի՝ ուղտ լինելու ապացուցելու բեռը՝ ըստ Yerkir.am-ի լրագրողներին ասաց «Ադեկվադ» միաբանության ղեկավար Արթուր Դանիելյանը, որին հրավիրել են քրեական ոստիկանության գլխավոր վարչության ՀԱՄԱԴՊՎ ահաբեկչության և ծայրահեղականության դեմ պայքարի բաժին։

Այդ ընթացքում «Ադեկվադ» միաբանության անդամներից մոտ 20-ին ոստիկանության աշխատակիցները բերման ենթարկեցին՝ պատճառաբանությամբ, որ չեն ենթարկվել պարետի որոշմանը։

Միաբանության ներկայացուցիչ Լիլիթ Թումանյանը լրագրողներին ասաց, որ ինքը տեղյակ է, որ միաբանության անդամները պահպանել են սոցիալական հեռավորություն, չի եղել որևէ խախտում․ «Իրականում սոցիալական հեռավորության պահպանումը և, առհասարակ, արտակարգ դրության ռեժիմի պահպանումն արվում է բացառապես որպես քաղաքական մահակ։ Ընտրողական մոտեցում է ցուցաբերվում, որովհետև հիմա Կասկադում, եթե զբոսնեք, կտեսնեք ավելի շատ մարդ ավելի փոքր տարածքում։ Խնդիրը և դրդապատճառները քաղաքական են», - ասաց Լիլիթ Թումանյանը։

Արթուր Դանիելյանի խոսքով՝ տեղի ունեցող գործընթացը իշխանությունների կողմից կազմակերպված հերթական կրկեսային ներկայացումն էր․ «Մենք ունենք փաստեր, որ կա կենդանի, որը շաբաթներ շարունակ կարող է քայլել անապատում, ունի կենդանուն բնորոշ բոլոր հատկությունները, բայց մեր իրավապահ մարմիններն այդ կենդանուն չեն տեսնում և պահանջում են, որ մարդիկ ապացուցեն, որ սենյակում կա ուղտ։ Տվյալ դեպքում մեզանից պահանջում են ապացուցել, որ վարչապետի մերձավորները որևէ կապ ունեն այն մաքսանենգության հետ, որն առանձնահատուկ ցինիկությամբ կազմակերպվել է վերջին մի քանի ամսվա ընթացքում», - ասաց Արթուր Դանիելյանը։

Նա ասաց, որ խոսքը ծխախոտի և ադամանդների՝ ՌԴ ապօրինի ներմուծման մասին է։

«Ունենք ինքնաթիռներ, մաքսանենգ բեռ, բազմաթիվ հաղորդումներ դրա մասին, բայց չգիտես ինչու, իրավապահ մարմինները հարցաքննում են ոչ թե կարգո տերմինալի աշխատակիցներին, օդաչուներին, մաքսավորներին, այլ ֆեյսբուքյան այն օգտատերերին, ովքեր ֆիքսել են, որ դա տեղի է ունեցել», - ասաց Արթուր Դանիելյանը։

Հիշեցնենք, որ «Ադեկվադ» միաբանության ղեկավար Արթուր Դանիելյանը նախապես հայտարարություն էր տարածել, որ հրավիրվել էր ՀՀ ոստիկանության քրեական ոստիկանության գլխավոր վարչության ՀԱՄԱԴՊՎ ահաբեկչության և ծայրահեղականության դեմ պայքարի բաժին միաբանությանը դեռևս անհայտ գործի շրջանակում բացատրություն տալու։ Միաբանությունը հույս էր հայտնել, որ քննվող գործը չի համալրի քաղաքական հետապնդումների նպատակով հարուցված քրեական գործերի ցանկը: «Ադեկվադը» նաև արձանագրել էր, որ  նախկին և ներկա իշխանությունների հանցավոր անգործության և անփութության, հաճախ՝ նաև հակապետական միտում պարունակող քայլերի հետևանքով ներկայումս որևէ պատիժ չեն կրել պետական շինություններ զավթած, ոստիկաններին գնդակահարած, բժիշկներին պատանդ պահած ահաբեկիչները: Պատիժ չեն կրել արդեն 8 ամիս շարունակ կոմայի մեջ գտնվող ՀՀ զինված ուժերի փոխգնդապետին ծեծի ենթարկած մերձիշխանական շրջանակները: Պատիժ չեն կրել երկրում սահմանադրական կարգ տապալած ու արդարադատությանը խոչընդոտած օտարերկրյա գործակալները՝ երկրի վարչապետի գլխավորությամբ: Պատիժ չեն կրել հացադուլի հետևանքով ազատազրկման վայրում մահացած լրագրողի մահվան պատասխանատուները և այլն: