ՏԵՍԱՆՅՈՒԹ․ Ծեծ կերած մարդկանցից պահանջում են մանդատ դնել․ ՀՔԾ-ում Մարուքյանին երկու ժամ հարցաքննել են

ՀՔԾ-ում ասել եմ այն, ինչ երևում է տեսանյութում, տևել է մոտ երկու ժամ՝ ըստ Yerkir.am-ի հայտարարեց «Լուսավոր Հայաստան» խմբակցության ղեկավար Էդմոն Մարուքյանը, որին ՀՔԾ են հրավիրել ԱԺ-ում տեղի ունեցած ծեծկռտուքի հարցով բացատրություն տալու։

ՀՔԾ-ի դիմաց լրագրողների հետ զրույցում նա ընդգծեց, որ բռնությունը չի դատապարտվում, հետևաբար, բռնության մշակույթը, որը, հայտարարվել էր, իբր, տեղ չունի, շատ լավ տեղ ունի այսօր Հայաստանում:

Մինչ ՀՔԾ-ում բացատրություն տալը Մարուքյանը եղել է դատաբժշկի մոտ:

Նա վերահաստատեց՝ միջադեպից հետո իր հիմնական ակնկալիքը քաղաքական է՝ հարցը քաղաքական է, քաղաքական հետևանք պետք է ունենա։

«Որովհետև եթե դա չի դատապարտվում քաղաքական մակարդակում, կարող է կրկնվել, և ամեն պատգամավոր ելույթ ունենալուց առաջ կարող է մտածել, որ իրեն կարող են խփել, իր նկատմամբ բռնություն կիրառել՝ իր հայտնած կարծիքի, հայտարարությունների համար»,-ասաց Մարուքյանը։

Նա քաղաքական գնահատական է սպասում ոչ միայն իշխող ուժից:

«Եթե խորհրդարանում պատգամավորների նկատմամբ բռնություն է կիրառվում, մի քանի օր հետո օմբուդսմենին են սպառնում, մյուսը օրը փողոցում են մարդ ծեծելու, ուրիշ բաներ են լինելու: Իշխանություններն ամեն ինչ անում են, որ բռնության զոհերին դարձնեն հիմնական մեղավորներ, ինչը չի ստացվի»,-ասաց նա:

Նա խոսեց նաև «Իմ քայլը» խմբակցության ղեկավար Լիլիթ Մակունցի հայտարարության մասին, թե իշխանական պատգամավորներ Սասուն Միքայելյանը, Արտակ Մանուկյանը և Վահե Ղալումյանը մանդատները վար կդնեն, եթե այդպես վարվեն ընդդիմադիր խմբակցությունից Էդմոն Մարուքյանը, Հրանտ Այվազյանը և Սարգիս Ալեքսանյանը։

«Ուզում են՝ ընդդիմությունը մանդատները վար դնի, որ իրենք ի՞նչ անեն, երկիրն ուզում են բռնապետությո՞ւն դարձնել: Ծեծ կերած մարդկանցից պահանջել մանդատ դնել, երևի Հյուսիսային Կորեայում  էլ չկա նման բան: Դա ամբողջատիրական  մտածողության հարց է, ինչի մեջ այսօր մեր իշխանություններն են»,-ասաց Էդմոն Մարուքյանը:

Մանրամասն՝ տեսանյութում․