Լուկաշենկոն այլ երկրների ղեկավարներին հրավիրել է Մինսկ` մասնակցելու մայիսի 9-ի շքերթին

Բելառուսի նախագահ Ալեքսանդր Լուկաշենկոն այլ երկրների ղեկավարներին հրավիրել է Մինսկ` մասնակցելու մայիսի 9-ի` Հաղթանակի տոնին նվիրված շքերթին. ըստ yerkir.am-ի տեղեկացնում է ԲԵԼՏԱ-ն:

ԶԼՄ-ների ներկայացուցիչների հետ հանդիպման ժամանակ նա ասել է. «Հրապարակավ  հրավիրում եմ պետությունների ղեկավարներին, թեկուզ` նախկին Միության, գալ Մինսկ»:

Լուկաշենկոյի կարծիքով` Հաղթանակի 75-ամյակը հենց Բելառուսում նշելը ճիշտ կլինի, քանի որ Բելառուսն է 1941-ին ստացել առաջին հարվածը: «Այն ամենատուժած հանրապետությունն է, պատերազմի կենդանի հուշարձան»,- ասել է Բելառուսի նախագահը:

Կորոնավիրուսի համավարակի պայմաններում չեղարկվել են  ֆաշիստական Գերմանիայի դեմ հակահիտլերյան կոալիցիայի հաղթանակին նվիրված բոլոր միջոցառումները, այդ թվում` Մոսկվայի շքերթը: