Վրաստանի պատրիարքը տեսիլք է ունեցել կորոնավիրուսի մասին

Վրաստանի կաթողիկոս-պատրիարք Իլյա Երկրորդը պատմել է չինական կորոնավիրուսի վերաբերյալ իր տեսիլքի մասին. տեղեկացնում է yerkir.am-ը՝ Rambler-ին հղումով:

Պատրիարքն իր հոգևոր հոտին այդ մասին հայտնել է կիրակնօրյա քարոզի ժամանակ և հայտարարել, որ մարդկությունը կդիմակայի այդ հիվանդությանը: Ըստ Իլյա Երկրորդի՝ հրե մարդ է թռչել իր գլխավերևով, հետո՝ անհետացել, այնուհետև պատրիարքը տեսել է երեխայի, որը մոտեցել է նրան ու թքել գետնին: Երեխան մատով խառնել է թուքն ու իր ճակատին խաչ նկարել:

Պատրիարքի կարծիքով՝ այդ նշանն ասում է, որ մարդիկ կհաղթահարեն վտանգավոր հիվանդությունը: Նա նաև հավելել է՝ մարդիկ դեռ չգիտեն՝ կորոնավիրուսն «Աստծո՞ւց է, թե՞ չարից»:

«Մի բան եմ ուզում միայն ասել՝ առանց Տիրոջ դա տեղի չէր ունենա: Եվ աղոթքի միջոցով ու Աստծո օրհնությամբ մենք կկարողանանք հաղթահարել այդ հիվանդությունը»,- ասել է Իլյա Երկրորդը:

Վրաստանում կորոնավիրուսով վարակվածության 3 դեպք կա արդեն. հիվանդացածներից երկուսը վերադարձել են Իրանից, մեկը՝ Իտալիայից: