34-ամյա արմավիրցին խարդախությամբ 14 կանանցից հափշտակել է շուրջ 30 մլն դրամ. թիրախում եղել են միայնակ կանայք

Մասնավորապես՝ պարզվել է, որ Արմավիրի մարզի բնակիչը, տիրապետելով մարդկանց վստահությունը ձեռք բերելու եւ հեշտությամբ մոլորության մեջ գցելու հոգեբանական հնարքներին, որոշել է խաբեությամբ հափշտակություններ կատարել, իսկ որպես զոհ ընտրել եւ թիրախավորել է ամուսնալուծված կամ միայնակ ապրող կանանց:

Իր մտադրությունն իրագործելու համար նրանց հետ հիմնականում ծանոթություն է հաստատել «Ֆեյսբուք» եւ «Օդնոկլասնիկի» սոցիալական կայքերի միջոցով, որի ժամանակ ներկայացել է իբրեւ պետական պաշտոնատար անձ եւ վստահելի անձնավորության տպավորություն թողնելու նպատակով՝ ամուսնանալու, ընկերակցելու, սոցիալական եւ բնակարանային պայմանները բարելավելու կեղծ խոստումներ տալով, բնակարանի ձեռքբերման շինծու պատրվակով, չարաշահելով թվով 14 կանանց վստահությունը՝ 2017-2019 թթ. ընթացքում կատարել է 18 դրվագ ուրիշի գույքի զգալի, խոշոր եւ առանձնապես խոշոր չափերի հափշտակություններ՝ ընդհանուր առմամբ հափշտակելով շուրջ 30.000.000 ՀՀ դրամ գումար:

Այնուհետեւ, որպեսզի խաբեությամբ հափշտակված գումարներն օրինականացնի, իր մտերիմներին հաշվառել է վճարային համակարգերից մեկում և տիրապետելով մուտքանվանն ու գաղտնաբառին՝ բջջային հեռախոսի հավելվածի միջոցով անձամբ տնօրինել է նրանց հաշվառման հաշիվները, որոնց էլ տուժող կանայք փոխանցել են գումարները:

Արդյունքում՝ հաշիվներին փոխանցված գումարները կանխիկացնելու եղանակով հափշտակվել է:

Արմավիրի մարզի բնակչին մեղադրանք է առաջադրվել: Քրեական գործը՝ մեղադրական եզրակացությամբ, ուղարկվել է դատարան: