Սիրիայում ռազմական գործողությունները կշարունակվեն մինչև ահաբեկիչների լիարժեք հեռացումը. Չավուշօղլու

Թուրքիայի արտգործնախարար Մևլյութ Չավուշօղլուն հայտարարել է, որ Թուրքիան կշարունակի ռազմական գործողությունները Սիրիայում այնքան ժամանակ, քանի դեռ ահաբեկիչներն ամբողջությամբ դուրս չեն եկել այդ տարածքներից, իսկ Սիրիայի տարածքային ամբողջականությունը պահպանվելու է. հայտնում է ՌԻԱ «Նովոստի»-ն: 

«Ոչ ոք չի կարող մեզ մեղադրել տարածաշրջանում ժողովրդագրական իրավիճակը փոխելու փորձերի համար: Սիրիայում քրդերը անմարդկային տանջանքների են ենթարկվում ԻՊ-ի կողմից: Ռազմական գործողության հետևանքով կապահովվի Սիրիայի տարածքային ամբողջականությունը: Մենք կշարունակենք գործողություններն այնքան ժամանակ, քանի դեռ ահաբեկիչները լիովին դուրս չեն եկել այդ տարածքներից»,- մանրամասնել է Չավուշօղլուն:

Հիշեցնենք, որ հոկտեմբերի 9-ին Թուրքիայի նախագահ Ռեջեփ Թայիփ Էրդողանը հայտարարել է, որ երկրի ԶՈւ-ն սկսել է «Barış Pınarı-Խաղաղության ակունք» ռազմական գործողությունը Սիրիայում: