Թուրքամետ ահաբեկիչների հրամանատարը պաշտոնապես հաստատել է ահաբեկիչների տեղափոխումը Ադրբեջան

«Սիրիայի ազգային բանակ» ահաբեկչական կազմակերպությունը, որը գործում է Թուրքիայի հովանու ներքո և պատերազմում է Սիրիայի օրինական իշխանությունների (Բաշար  ալ Ասադ) դեմ, հաստատել է, որ իր զինյալները տեղափոխվել են Ադրբեջան՝ Հայաստանի և Արցախի դեմ կռվելու։ Այս մասին քրդական Rudaw գործակալության հետ զրույցում նշել է կազմակերպության հրամանատարներից գեներալ Զիյադ Հաջի Ուբեյդը։

«Զինյալները վատ տնտեսական պայմանների պատճառով իրենց ընտանիքների գոյությունը ապահովելու համար հարկադրված Ադրբեջան են գնացել՝ պատերազմելու։ Աֆրինի, Սերե Քանիյեի և այլ շրջանների տնտեսական դրությունը շատ վատ է, և ընտանիքները  չեն կարողանում իրենց գոյությունն ապահովել»,- նշել է ահաբեկիչների հրամանատարը։

Ուբեյդն ասել է, որ Թուրքիան տնտեսապես աջակցում է 70 հազարից ավելի զինյալի, որոնք պատրաստ են ամեն տեղ պատերազմել՝ հանուն Թուրքիայի ազգային շահերի։ Նա նաև ընդգծել է, որ իր վարձկան-զինյալները նույն կերպ կռվում են Լիբիայում։

Հիշեցնենք, որ Աֆրինը, Սերե Քանիյեն (Ռաս ալ Այն) և այն շրջաններ ապօրինաբար բռնազավթվել են Թուրքիայի կողմից: