Թուրքիա Թել Ապիատ ցամաքային ներխուժման փորձ կը կատարէ

ՍԱՆԱ-ի թղթակիցը յայտնեց, որ Թուրքիա քանդած է Սուրիոյ հիւսիսային շրջանի Ռաս ուլ Այն աւանի Թուրքիոյ հետ արեւտմեան սահմանի Թել Հալաֆ գիւղին մօտ իր իսկ պատած պարիսպէն բաժին մը, նախապատրաստուելու սուրիական տարածք ցամաքային ներխուժման։  

Միեւնոյն ատեն թրքական օդուժը հրթիռակոծած է նոյն շրջանի Թել Արքամ գիւղը։ 

ՍԱՆԱ-ի թղթակիցին համաձայն, տեղական աղբիւրներ յայտնած են, որ այսօր առաւօտ թրքական ուժեր ցամաքային ներխուժում կատարած են Ռաքքայի հիւսիսային շրջանի Թել Ապիատ աւանի Իապիսէ, Մունպաթահ, Պէր Աշէք եւ Հաուիէ գիւղերը։ 

Երէկ, թրքական կողմին հրթիռակոծումներուն հետեւանքով Գամիշլիի, Տերպեսիէի եւ Ռաս ուլ Այնի մէջ 8 քաղաքացի զոհուած էր, երկուքը՝ քրիստոնեայ, եւ 20 ուրիշներ վիրաւորուած էին։ 

Թրքական յարձակումները թիրախ դարձուցած են տուեալ շրջաններու ենթակառոյցները, ջուրի եւ ելեկտրականութեան ընկերութիւնները եւ այն ամբարտակները, որոնք միլիոնաւոր մարդոց ջուր կը մատակարարեն։

KANTSASAR