ԱՄՆ-ը պատրաստվում է Ավստրալիայում ռազմական ենթակառուցվածքներ կառուցել

Ամերիկայի Միացյալ Նահանգները պատրաստվում է ռազմական ենթակառուցվածքներ կառուցել Ավստրալիայում այն բանից հետո, երբ ԱՄՆ Կոնգրեսը կհաստատի ԱՄՆ ռազմածովային ուժերին 211.5 միլիոն դոլար տրամադրելու նախագիծը: Այս մասին ասել է Ավստրալիայի արտգործնախարար Մարիսե Փեյնը. հայտնում է Reuters-ը:

Ավստրալիայում ԱՄՆ-ի ավելի մեծ ազդեցություն ունենալու պլանները հետևանք են այն բանի, որ արևմտյան դաշնակիցներն ավելի ու ավելի են մտահոգվում Չինաստանի`Խաղաղ օվկիանոսում ազդեցությունն ավելի ընդլայնելու ջանքերից:

Փեյնը չի մանրամասնել, սակայն, թե ինչ ռազմական ենթակառուցվածքներ են ցանկանում կառուցել Միացյալ Նահանգները, բայց ավստրալական ԶԼՄ-ները տեղեկացրել են, որ հուլիս ամսվա սկզբին Վաշինգտոնը ծրագրում էր նոր նավահանգստային օբյեկտի կառուցում  Ավստրալիայի հյուսիսային տարածքի մայրաքաղաք Դարվինի մոտ:

Եթե Միացյալ Նահանգները Դարվինում նավահանգիստ կառուցի, ապա այն տեղակայված կլինի Դարվինի նավահանգստի մերձակայքում, որը չինական «Landbridge Group Co» ընկերությունը դեռևս 2015-ին 99 տարվա վարձակալական հիմունքներով վերցրել էր: Այն, անշուշտ, կհանգեցնի ԱՄՆ զայրույթին:

Հիշեցնենք, Վաշինգթոնի և Պեկինի միջև լարվածությունը սրվել է ԱՄՆ նախագահ Դոնալդ Թրամփի` 2016 թվականի նախագահական ընտրություններից հետո, որը պատճառ դարձավ Չինաստանի հետ առևտրային պատերազմի` միաժամանակ ավելացնելով նաև զորավարժությունները Ասիա-խաղաղօվկիանոսյան տարածաշրջանում: