Բիջան Ռաֆիեքիանը մեղավոր է ճանաչվել՝ ԱՄՆ-ում Թուրքիայի օգտին լոբբիստական ապօրինի գործունեության մեջ

Դոնալդ Թրամփի ազգային անվտանգության հարցերով նախկին խորհրդական Մայքլ Ֆլինի բիզնես-գործընկեր Բիջան Ռաֆիեքիանը մեղավոր է ճանաչվել՝ Միացյալ Նահանգներում Թուրքիայի օգտին լոբբիստական ապօրինի գործունեություն իրականացնելու եւ որպես օտարերկրացի գործակալ չգրանցվելու համար:

Մասնավորապես՝ նա փորձել է համոզել ԱՄՆ-ի կառավարությանը Թուրքիային արտահանձնել Նահանգներում բնակվող իսլամի քարոզիչ Ֆեթուլլահ Գյուլենին, որին պաշտոնական Անկարան մեղադրում է 2016-ի հեղաշրջման փորձը կազակերպելու համար:

Դատախազների պնդմամբ՝ Մայքլ Ֆլինը եւ նրա գործընկեր Բիջան Ռաֆիեքիանը 2016 թվականի աշնանը մեծ գումարներ էին ստացել թուրքական կառավարությունից Գյուլենի արտահանձմանն ուղղված գործողություններ իրականացնելու համար: Նրանց գործունեությունն էլ համակարգել էր թուրք գործարար Էքիմ Ալփթեքինը, որին նույնպես մեղադրանքներ են առաջադրված, թեեւ նա չի ներկայանում ամերիկյան դատարան:

Ենթադրվում է, որ ներկայում նա Թուրքիայում է բնակվում: Իսկ ծագումով իրանցի գործարար Ռաֆիեքիանի դատավճիռը Վիրջինիա նահանգի դատարանը կհրապարակի հոկտեմբերին: Նրան սպառնում է մինչեւ 15 տարվա ազատազրկում: