Ոստիկանությունն, իհարկե, ունի տվյալներ, թե ովքեր են կանգնած ապօրինի ծառահատման հետևում. փոխոստիկանապետ

Ոստիկանությունն իր օպերատիվ գործողությունների ընթացքում, իհարկե, հավաքել է տվյալներ, թե ովքեր են կանգնած ապօրինի ծառահատման հետևում. այսօր կառավարության նիստից հետո լրագրողների հետ ճեպազրույցում ասաց  ոստիականության պետի տեղակալ, գնդապետ  Վարդան Մովսիսյանը` անդրադառնալով հարցին, թե ովքեր են կանգնած ապօրինի ծառահատման ստվերային բիզնեսի հետևում:

«Ես չեմ կարող դա հրապարակել, քանի որ դեռ քննության և ուսումնասիրության ընթացքում է: Հետո ի՞նչ իրավունքով կարող ենք, դեռ չհաստատված, մարդուն կասկածյալ կամ մեղավոր ճանաչել»,- ասաց նա:

Ճշտող հարցին` դա, ի վերջո, հրահրվե՞լ է ինչ-որ մեկի կողմից, գնդապետն արձագանքեց. «Այն, ինչ կազմակերպվում է, կոչվում է բիզնես: Ինչպես լսեցիք, վարչապետը նշեց, որ այդ սևագործ աշխատանքն իրականացնողները, երևի չեն հարստացել, եթե մենք նայենք նրանց իրավիճակին, բայց մի խումբ մարդիկ, որոնք ղեկավարել են ու ստվերում են գտնվել, հարստացել են»:

Հարցին` պարբերաբար նման գործողություններ տեսնում ենք ինչ-որ կազմակերպված անձանց կողմից, հարց չի՞ ծագում, թե ինչու այս տարիների ընթացքում երբեք չի բացահայտվել այդ կոռուպցիոն սխեման, և հիմա նոր է այն գործի դրվում, փոխոստիկանապետը պարզաբանեց. «Մենք այն հանրապետությունն ենք և այն ազգաբնակչությունը, որ շատ լավ տեղեկացված ենք այդ պրոցեսներից: Այնպես չէ, որ այդ պրոցեսներն ապօրինի ծառահատման ուղղությամբ չեն իրականացվել ոստիկանության կողմից, դրանք եղել են ակտիվացման փուլում: Այն, ինչ եղել է մինչև իրավիճակի փոփոխությունը,  առանձին քննարկման խնդիր է: Բացասական երևույթները եղել են, կոռուպցիոն երևույթները եղել են: Լոռու, Տավուշի մեր անտառների հատվածներում նման երևույթներ, իհարկե, մոտ 30 տարի եղել են»:

Ավելի վաղ տեղեկացրել էինք, որ հուլիսի 17-ին երեկոյան Իջևանում անտառահատումների պահանջով ճանապարհը փակած ցուցարարներին ոստիկանության ծառայողները փորձել են հեռացնել ճանապարհի երթևեկելի հատվածից: Տեղի են ունեցել բախումներ, ինչի հետևանքով  ոստիկանության ծառայողներ ու քաղաքացիներ են վիրավորվել:  

Ոստիկանության ծառայողների նկատմամբ կյանքի կամ առողջության համար վտանգավոր բռնություն գործադրելու, խուլիգանություն կատարելու դեպքի առթիվ հարուցվել է քրեական գործ: