Հայաստանում էներգետիկ ցանցի ապահովվածությունը բարձր մակարդակի վրա է. փոխնախարար

Էներգետիկ համակարգում երկու օր առաջ տեղի ունեցած վթարն այնքան մեծ էր, որ հնարավոր էր ունենայինք էլեկտրաէներգիայի ամբողջական դադարեցում, և վերականգնումը մի քանի օր կտևեր: Այս մասին այսօր լրագրողների հետ զրույցում նշեց տարածքային կառավարման և ենթակառուցվածքների փոխնախարար Հակոբ Վարդանյանը:

«Եթե մենք զրոյի չենք նստել, ամենամինիմալ վիճակում ունեցել ենք 40-45 տոկոս էլեկտրաէներգիայի մատակարարում, և վիճակն արագ կայունացվել է, նշանակում է, որ համակարգը լիովին պատրաստ էր»,- ասաց նա:

Փոխնախարարը մեկ անգամ ևս տեղեկացրեց, որ վթարից անմիջապես հետո, երբ պարզ դարձավ, որ ռեակտիվ էներգիայի երկու մեծ աղբյուրները չեն գործում, ռեակտիվ էներգիայի ներմուծում է տեղի ունեցել Վրաստանից և Իրանից: «Դրա արդյունքում լարումը վերականգվեց, Սևան-Հրազդան կասկադը շատ արագ վերականգվեց ու մտավ համակարգ»,- նշեց նա:

«Եթե ատոմակայանը այդ պահին միացված լիներ, հնարավո՞ր է վթարն ազդեր նաև ՀԱԷԿ-ի աշխատանքի վրա հարցին» փոխնախարարը պատասխանեց. «Եթե ՀԱԷԿ-ը միացված լիներ, ավելի հեշտ կլիներ, որովհետև կունենայիք ևս մեկ ռեակտիվ էներգիայի աղբյուր: Մինչև վթարը ատոմակայանին հասնելը` բազմաթիվ ռելեական սարքավորումներ կան, որոնք կաշխատեին, ինչպես աշխատեցին Երևանի ՋԷԿ-ում և Հրազդանի ՋԷԿ-ի 5-րդ բլոկում»:

Հակոբ Վարդանյանը հայտնեց, որ նախարարությունում ստեղծվել է աշխատանքային խումբ՝  ուսումնասիրություն կատարելու համար, որպեսզի հետագայում պատկերացում կազմեն իրենց շահագործման թերությունների, խնդիրների վերաբերյալ և փորձեն դրանք շտկել: Վերլուծություններից հետո հնարավոր կլինի խոսել նաեւ վթարի պատճառների մասին. արդեն բոլոր խոշոր կայանների ու ենթակայանների կրիչներից բոլոր տվյալները ստացված են:

Ըստ փոխնախարարի՝ այս պահին երկու վարկած կա, մեկը` որ հնարավոր է հաճախականության տատանումը եկած լինի Իրանից, մյուսը՝ տեխնոլոգիական խնդիր առաջացած լինի երկու կայաններում (Հրազդանի ՋԷԿ-ի 5-րդ էներգաբլոկ և Երևանի ՋԷԿ):

Դիտարկմանը, որ վարչապետ Նիկոլ Փաշինյանը նշել էր, թե ներքին պատճառը բացառվում է, երկու վարկած կա, երկուսն էլ արտաքին են, Հակոբ Վարդանյանն արձագանքեց. «Վարչապետի հայտարարությունից հետո ուսումնասիրման դինամիկան փոխվել է: Վարչապետին զեկուցվել են այդ պահին առկա վարկածները, սակայն մենք հիմա չենք բացառում, որ վթարը եղել է ներքին տեխնոլոգիական խնդրի պատճառով` Երևանի ՋԷԿ-ում կան Հրազդանի ՋԷԿ-ի 5-րդ էներգաբլոկում:  Երբ ամբողջական պատկերը պարզ լինի, ես ավելի հստակ կասեմ: Հիմա ճիշտ չէ կտրված բաներ ասել, որոնք միգուցե հետո հերքվեն: Չեմ կարող ասել, թե որն է ավելի հավանական տարբերակ: Մենք իրանցի գործընկերներից հենց առաջին րոպեներից տեղեկություն ենք ստացել, որ իրենք ունեցել են վթար, հետո իրենցից ստացել ենք տեղեկություն, որ վթարը լոկալ է եղել և չի հասել մեզ: Մեր տեսչական մարմինները պետք է զբաղվեն այս հետաքննությամբ և զբաղվում են»:

Փոխնախարարի հավաստմամբ՝ մոտ մեկ ամսվա ընթացքում կլինի պատասխանը: «Միգուցե հնարավոր է երկարի, չեմ կարող ասել, որովհետև բազմաթիվ տվյալներ են ճշտվում: Հաճախականության տատանումները մոտ 35-40 րոպե են տևել: Պետք է ստուգվեն բոլոր կրիչները, որոնք բազմաթիվ են: Մենք համագործակցում ենք բոլոր իրավապահ մարմինների հետ և տրամադրում ենք այն տեղեկությունները, որոնք ունենք»,- հայտնեց նա:

Հարցին, թե էներգետիկ ցանցի ապահովվածությունը հաքերային հարձակումներից ինչ մակարդակի վրա է, Վարդանյանը պատասխանեց. «Բարձր մակարդակի վրա է, բայց ամբողջ աշխարհում ամենահուսալի բանն էլ հնարավոր է խափանել, որովհետև ստեղծված է մարդու կողմից, մարդն էլ կարող է խափանել: Այսօր գործող լավագույն համակարգն է Հայաստանում ներդրված»: