Արտահերթ խորհրդարանական ընտրությունները բարձր մակարդակի վրա էին, բայց չի նշանակում, որ կատարյալ էին. Սվիտալսկի

Մենք պատրաստվում ենք բարձր մակարդակի ինտենսիվ հանդիպումների, նախատեսում ենք միջոցառումների ուղեցուցային շարք առաջիկա ամիսների համար, ինչը ցույց է տալիս, որ Հայաստան-ԵՄ երկկողմ հարաբերությունները զարգանում են շատ կառուցողական, կա  մեծ դինամիկա. այսօր հրավիրված ասուլիսում ասաց ՀՀ-ում ԵՄ պատվիրակության ղեկավար, արտակարգ և լիազոր դեսպան Պյոտր Սվիտալսկին: 

«Մենք շատ ինտենսիվ շփումների ենք պատրաստվում նաև աշխատանքային մակարդակով: Կցանկանայի ձեզ տեղեկացնել, որ ենթահանձնաժողովների մակարդակով Բրյուսելում հանդիպումներ պիտի տեղի ունենան Հայաստանի և Եվրամիության միջև կնքված համապարփակ և ընդլայնված գործընկերության համաձայնագրի շրջանակներում (ՍԵՊԱ): Նախատեսվում է նաև այց Երևան: Երբ նայում եմ մեր միջոցառումների օրացույցին, տեսնում եմ, որ իսկապես հասել ենք այն  փուլին, երբ շատ դինամիկ երկխոսություն է տեղի ունենում երկու կողմերի միջև, ինչը շատ ոգեշնչող է և հուսադրող»,- նշեց դեսպանը:

Անդրադառնալով Հայաստանի արտահերթ խորհրդարանական ընտրություններին՝ ԵՄ պաշտոնյան նշեց, որ դրանք շատ բարձր մակարդակի վրա էին և բավարարում էին միջազգային չափորոշիչներին, ինչի մասին վկայում էր ընտրությունների արդյունքների բողոքարկման բացակայության փաստը:

«Իհարկե, սա չի նշանակում, որ ընտրությունները կատարյալ էին, որովհետև կային որոշակի թերություններ, որոնք հիշատակվել են միջազգային զեկույցներում: Սա ցույց է տալիս, որ աշխատանքն այս ուղղությամբ պետք է շարունակել: Որքանով հասկանում եմ կառավարության ծրագրից և խորհրդարանի ղեկավարների հայտարարություններից, Հայաստանը հստակ մտադրություն ունի արդիականացնելու և բարելավելու Ընտրական օրենսգիրքը, շարունակելու աշխատել ընտրական բարեփոխումների ուղղությամբ: Եվ մենք՝ որպես Եվրամիություն, պատրաստ կլինենք շարունակել մեր աջակցությունն ու ներգրավվածությունն այս գործընթացում»,- շեշտեց ԵՄ պատվիրակության ղեկավարը՝ հավելելով, որ կառավարության ծրագիրը ելակետային կետ է իրենց համար՝ հասկանալու, թե ինչպես Եվրամիությունը կարող է սատարել ՀՀ-ին տարբեր բաղադրիչների իրականացման գործում: