Առանց մեղադրական դատավճռի գույքի բռնագանձումը ներդրումների վրա չի ազդի. նախարար

Կառավարության այսօրվա նիստից հետո  արդարադատության նորանշանակ նախարար Ռուստամ Բադասյանը լրագրողների հետ զրույցում ասաց, որ առանց մեղադրական դատական վճռի գույքի բռնագանձման նախագիծը արդեն պատրաստ է:

«Հիմա միջազգային փորձաքննության փուլում է: Եվրախորհրդարանի կողմից փորձագիտական միջանկյալ կարծիք արդեն ստացվել է: Սպասում ենք նաև մեր մյուս միջազգային գործընկերների կարծիքին»,- ասաց նա:

Հարցին, թե այդ նախագիծը կարո՞ղ է վնասել ներդրումներին, նախարարը բացասական պատասխան տվեց. «Ծիծաղելի է, ու, առհասարակ, այն շահարկումները, որ սա ուղղված է հարուստ մարդկանց դեմ, նույնպես զավեշտների շարքից է»:

Լրագրողները հետաքրքրվեցին` ինչպե՞ս է հաջողվելու պարզել` անօրինակա՞ն է ձեռք բերել գույքը, թե՞ ոչ, Բադասյանը մեկնեց` այդ մեխանիզմներն առկա են օրենքում:

«Մարդու գույքի` օրինական լինելը դատախազությո՞ւնն է որոշելու»,- հարցրեցին լրագրողները:

«Որոշվելու է դատարանի վճռով, բայց դատարանը դեռ չենք ընտրել։ Եկեք մեկընդմիշտ ֆիքսենք՝ քանի որ դատավճիռը քրեական գործերին է վերաբերում, այս` «առանց դատավճռի» տերմինը նշանակում է, որ անձի մեղավորությունը քրեական դատավարության կարգով հաստատված լինելուն է վերաբերում, ոչ թե նրան, որ ՀՀ-ում հնարավոր է երբևէ որևէ մեկի սեփականության իրավունքին միջամտել առանց դատարանի»,- պատասխանեց Բադասյանը:

Նախարարն ասաց, որ այս գործերով հարցը ներկայացվելու է ոչ թե անձի, այլ գույքի դեմ: «Դատարանում, որպես պատասխանող, հանդես է գալու ցանկացած անձ, ոչը կարծում է, որ այդ գույքի հետ կապված իրավունք կա։ Այսինքն՝ այս դեպքում ոչ թե սահմանվում  է պատճառահետևանքային կապ արարքի և հետևանքի միջև, այլ բարձրացվում է գույքի օրինականության ծագման հարցը»։