Կլիմայի փոփոխությունը սպառնում է Ակրոպոլիսին

Կլիմայի փոփոխությունը սպառնում է հին հունական հուշարձաններին, այդ թվում` աշխարհում ամենամեծ այցելությունների քանակ ունեցող  Ակրոպոլիսին. հայտնում է Reuters-ը:

Նշվում է` օդի աղտոտումն ու թթվային անձրևները քայքայում են մարմարը, որից կառուցված են շինությունները, իսկ այն եղանակային պայմանները, ինչպիսիք են հորդառատ անձրևները կամ երաշտ, կարող են հնագույն տաճարների կառուցվածքային խնդիրներ առաջացնել:

Թեև Հունաստանի ամենալավ պահպանված պատմական հուշարձանը Պարթենոնի տաճարն է, այնուամենայնիվ, կան նախանշաններ, որ կլիմայի փոփոխությունը կարող է ազդել այդ հուշարձանի վրա:

«Հնագույն քաղաքի պատերն առավել հակված են փլուզմանը»,-  Reuters-ի թղթակցի հետ զրույցում ասել է Հունաստանի մշակույթի նախարարության մամուլի խոսնակ Մարիա Վլազակին` հավելելով, որ տարեցտարի ավելի շատ խնդիրներ են առաջանում, և մեծ գումարներ են ներդրվում հուշարձանների պահպանման համար:

Ի դեպ, միայն վերջին 10 տարվա ընթացքում Աթենքի տարածքը տուժել է տարատեսակ ջրհեղեղներից և անտառային հրդեհներից: