ԵՄ առաջնորդներն ընդհանուր համաձայնության չեն եկել ԵՀ նոր ղեկավարի ընտության հարցում. կանցկացվի արտահերթ գագաթնաժողով

Եվրամիության պետությունների ու կառավարությունների ղեկավարները համաձայնության չեն եկել Եվրահանձնաժողովի նոր առաջնորդի թեկնածության շուրջ, ինչի հետևանքով էլ բանավեճերը շարունակելու նպատակով հունիսի 30-ին արտահերթ գագաթնաժողով է նշանակվել Բրյուսելում: Այս մասին գագաթնաժողովի ամփոփիչ մամուլի ասուլիսում ասել է Եվրախորհրդի ղեկավար Դոնալդ Տուսկը: 

Նա մասնավորապես նշել է, որ առաջադրված թեկնածուներից ոչ ոք չունի մեծամասնություն, այդ իսկ պատճառով դեռ վաղ է խոսել անունների մասին, նաև հավելել է. «Մենք կրկին կհանդիպենք հունիսի 30-ի գագաթնաժողովում»:

Անդրադառնալով ԵՄ ղեկավարներին` Տուսկսը կարծիք է հայտնել, որ նրանք տրամադրված են փաթեթային որոշման հասնել ԵՄ-ի բոլոր հանգուցային պաշտոններում նշանակումների շուրջ: Բացի Եվրահանձնաժողովի ղեկավարից՝ նրանք պետք է որոշեն նաև, թե ով է հաջորդելու Տուսկին, ինչպես նաև ԵՄ արտաքին գործերի և անվտանգության քաղաքականության գերագույն ներկայացուցչին, որը կփոխարինի Ֆեդերիկա Մոգերինիին, Եվրախորհրդարանի նոր նախագահին՝ Անտոնիո Տայանիին և Եվրոպայի Կենտրոնական բանկի նախագահին՝ Մարիո Դրագիին: 

«Մենք մտադիր ենք գտնել փաթեթային լուծում, որը կներառի Եվրամիության ամբողջ բազմազանությունը»,- պարզաբանել է Տուսկը` նկատի ունենալով, որ ԵՄ ինստիտուտների նոր ղեկավարների կազմում պետք է լինեն թե’ տղամարդիկ և թե’  կանայք, որոնք ներկայացնում են Եվրամիության տարբեր տարածաշրջաններն ու քաղաքական կուսակցությունները:

Նա նաև հավելել է, որ ինքն այս պահի դրությամբ կշարունակի Եվրոպական խորհրդարանի հետ խորհրդատվությունները: