Աբովյանում հրդեհված մեքենայի և տան գործով հարցաքննվել է 20 մարդ․ ՔԿ ղեկավար

Աբովյանում քաղաքապետի ընտրություններից առաջ թեկնածուներից մեկի նախընտրական շտաբի ներկայացուցիչներից մեկի տան ու մեքենայի հրդեհման գործով հարուցվել է քրեական գործ, որի շրջանակներում որպես վկա հարցաքննվել է մոտ 20 մարդ. Լրագրողների հետ զրույցում ասաց ՀՀ քննչական կոմիտեի ղեկավար Հայկ Գրիգորյանը։

Պաշտոնյայի պնդմամբ՝ որպես կասկածյալ առայժմ ոչ ոք չի ներգրավվել։ Քրեական գործի շրջանակներում ճանաչվել է տուժողը, ինչպես նաև նշանակվել են հրդեհատեխնիկական ու դատաապրանքագիտական փորձաքննություններ։ Նախաքննությունը շարունակվում է։

Նա մանրամասնեց, որ գործը հարուցվել է քրեական օրենսգրքի 185-րդ հոդվածի երկրորդ մասով, որում ասվում է․ «Ուրիշի գույքը դիտավորությամբ ոչնչացնելը կամ վնասելը, որը զգալի չափերի վնաս է պատճառել և որը

կատարվել է հրկիզման, պայթյունի կամ հանրավտանգ այլ եղանակով,

խոշոր չափերի վնաս է պատճառել,

կատարվել է՝ կապված անձի կամ նրա մերձավորի կողմից իր ծառայողական կամ հասարակական պարտքը կատարելու հետ,

կատարվել է ազգային, ռասայական կամ կրոնական ատելության կամ կրոնական մոլեռանդության շարժառիթով՝ պատժվում է ազատազրկմամբ՝ առավելագույնը չորս տարի ժամկետով»։