Մնում է` թղթաբանական հարցերը լուծվեն. Այգեպարի հրդեհված տների բնակիչները գիշերելու տեղ ունեն

Տավուշի մարզի Այգեպար գյուղում հակառակորդի կրակոցների պատճառով հրդեհված 2 տների ընտանիքներն արդեն տեղավորվել են իրենց հատկացված տներում:

Yerkir.am-ի հետ զրույցում Այգեպարի գյուղապետ Անդրանիկ Այդինյանը նշեց, որ ընտանիքներին հատկացված տների կոմունալ հարցերն արդեն լուծել են:

«Որոշ թղթաբանական հարցեր են մնացել, դրանք էլ կամաց-կամաց կլուծենք, դրանք չեն խանգարում, որ բնակիչներն ապրեն իրենց տներում: Տները վերանորոգման կարիք ունեն, ահագին կահույք են նվիրել նրանց»,- ասաց Այդինյանը:

66-ամյա Վանո Վարդազարյանը, ով տուժած ընտանիքներից մեկի անդամներից է, նշեց, որ իրենց հատկացվել է 3 սենյականոց բնակարան:

«Նորմալ տուն է` խոհանոցով, բաղնիք-զուգարանով ու պատշգամբով: Ջրի հարցը ես լուծեցի, գազն ու հոսանքն էլ իրենք են քաշել: Ապրեն, հա: Հիմա Բերդում եմ, տան հարցով կանչել են, թղթաբանական հարցեր ենք լուծում: Մարզպետը պահանջել է, որ էդ հարցերն էլ շտապ կարգավորեն»,- ասաց նա, նաև տեղեկացրեց, որ օրերս իրեն են այցելել տարբեր մարդիկ ու կենցաղային իրեր բերել` սառնարան, հեռուստացույց, լվացքի մեքենա, գազօջախ,  նաև` հագուստ. «Սեղան-աթոռ էլ որ լինի, լավ կլինի»: