Անհրաժեշտության դեպքում ապրիլյանի հարցով քննիչ հանձնաժողովը կհրավիրի նաեւ Սերժ Սարգսյանին. Անդրանիկ Քոչարյան

Ապրիլյան պատերազմի հարցով քննիչ հանձնաժողովի նիստ կգումարվի այսօր` ժամը 3-ին, որտեղ կորոշվեն բոլոր հարցերը. լրագրողների հետ զրույցում ասաց ՀՀ ԱԺ «Իմ քայլը» խմբակցության պատագամավոր Տիգրան Կարապետյանը` հավելելով, որ նիստի ընթացքում կքննվեն ապրիլյան պատերազմի հետ կապված` հասարակությանը հուզող հարցերը:

Նա մանրամասնեց նաև, որ որևէ կաշկանդվածություն չունեն նախկին կամ ներկայիս պաշտոնյաների քննիչ հանձնաժողովի նիստերին հրավիրելու հարցում: «Որևէ անձի հրավիրելու հարցում կաշկանդվածություն չունենք` անկախ նրանից` ներկայումս պատգամավոր են, թե` նախկին: Քննելու ենք ամբողջ գործընթացը: Եթե Սերժ Սարգսյանին հրավիրելու անհրաժեշտություն առաջանա, կհրավիրենք»։

Տիգրան Կարապետյանը նշեց նաև, որ նիստին կարող են հրավիրվել նաև Արցախից պաշտոնյաներ: «Քննիչ հանձնաժողովը հրավիրում է, պարտադիր է ներկայանալը, այդ թվում` Արցախի Հանրապետությունից։ Կարծում եմ՝ Արցախի Հանրապետության մեր գործընկերները ևս շահագրգռված են, որ ապրիլյան հետ կապված բոլոր հարցերի պատասխանները ստանան»,- եզրափակեց նա:

Թեմային անդրադարձավ նաև Ապրիլյան պատերազմի հանգամանքների ուսումնասիրման քննիչ հանձնաժողովի նախագահ Անդրանիկ Քոչարյանը: 1in.am-ի հետ զրույցումխոսելով այն մասին, թե արդյո՞ք այսօր կայանալիք նորաստեղծ հանձնաժողովի նիստին ներկա կլինեն ընդդիմադիր խմբակցությունների պատգամավորներ, որոնք պնդում են`չնայած այն հանգամանքին, որ իրենք համամիտ են հանձնաժողովի աշխատանքներին, այնուամենայնիվ, հանձնաժողովի համար 40 և ավելի ստորագրություն վերցվել է միայն «Իմ քայլը» խմբակցությունից, և իրենց կարծիքներն անտեսվել են, նա ասաց, որ կա օրենքի ուժով ստեղծված հանձնաժողով: «Օրենքով պաշտպանության և անվտանգության ոլորտին վերաբերող հարցերի բացառիկ իրավունքը տրված է միայն պաշտպանության և անվտանգության հանձնաժողովին, և հանձնաժողովն` իր կազմով, որի մեջ կան նաև ընդդիմադիր անդամներ, քննարկելու է այս հարցի աշխատանքային պլանը, թե ինչպես ենք իրականացնելու օրենքով սահմանված լիազորությունները ապրիլյան դեպքերի ուսումնասիրության հարցով: Քննարկումից հետո, բնականաբար»,- պարզաբանեց Քոչարյանը:

Խոսելով հանձնաժողովի նիստերի անցկացման ձևաչափի մասին` նա շեշտեց, որ դրանք հիմնականում փակ կլինեն`հաշվի առնելով թեմայի զգայունությունը և փակ փաստաթղթերի առկայությունը, ինչը, հանձնաժողովի նախագահի խոսքով,  չի նշանակում, որ արդյունքների մասին տեղեկատվություն չի տրամադրվի: «Պարբերաբար կլինեն հաղորդագրություններ, հաղորդումներ և մամուլի ասուլիսներ` անհրաժեշտության դեպքում, ինչպես նաև հիմնավորված եզրակացություններ, որոնք կներկայացվեն հանրությանը և խորհրդարանին»,- վստահեցրեց Քոչարյանը:

Անդրադառնալով հանձնաժողովի աշխատանքներին Արցախի ներգրավվելու ցանկությանը` նա հայտնեց, որ ինքը ողջունում է նմանատիպ տրամադրվածությունը: «Այդպես պետք է մտածի յուրաքանչյուրը: Մեր հասարակության մոտ հարցեր առաջացրած զգայուն թեմաների պատասխանները պետք է գտնենք բոլորս միասին, անկաշկանդ: Հանձնաժողովին էլ պետք է տրամադրվեն բացառիկ բոլոր տեղեկատվությունները, որոնք լույս կսփռեն կուտակված բոլոր կասկածների վրա: Թե ինչքանով են արդարացված կամ չարդարացված այդ կասկածները, կապված է հանձնաժողովի էֆեկտիվ աշխատելու հետ: Չեմ կարծում` կլինի այնպիսի մեկը, որը կխուսափի հանձնաժողովի հրավերների առկայության դեպքում մասնակցելուց»,- պարզաբանեց հանձնաժողովի նախագահը:

Քոչարյանն անդրադարձավ նաև նախկին վարչապետ Կարեն Կարապետյանի այն հայտարարությանը, թե քառօրյայի ընթացքում վառելիքի հետ կապված խնդիր է եղել: «Հաշվի առնելով, որ ես նման աշխատանքի փորձ ունեմ, աշխատանքը մաքսիմալ կկազմակերպվի էֆեկտիվ ու կներառվեն այն մարդիկ, որոնք թեմայի շուրջ ասելիք ունեն հանձնաժողովին: Դա կլինի նախկին  վարչապետ, նախկին նախագահ, զինվորականներ: Ես նկատել եմ, որ պարոն Սեյրան Օհանյանը տեսակետ էր հայտնել, որ ինքն ունի մշակած ինչ-որ փաստաթուղթ, որը խիստ գաղտնի գրիֆով գտնվում է պաշտպանության նախարարությունում, բայց Սեյրան Օհանյանը թերահավատ էր` հանձնաժողովն ինչպես պետք է իրականացնի իր այդ առաքելությունը», - ասաց նա`միևնույն ժամանակ դիմելով պաշտպանության նախկին նախարարին, որ նա պետք է պատրաստ լինի հանձնաժողով գալուն և իր մոտ եղած ամբողջ տեղեկատվությունը ներկայացնելուն:

Խոսելով հանձնաժողովի կազմում պարտադիր զինվորական ծառայություն չանցած անձանց ներգրավվածության մասին` Քոչարյանը պարզաբանեց, որ հանձնաժողովում կա ընդամենը մեկ չծառայած մարդ` Քրիստինե Պողոսյանը:

Անդրադառնալով վերջերս տարածված այն տեսակետին, թե նախկին գլխավոր հարկադիր կատարող Միհրան Պողոսյանին  Ռուսաստանի կողմից ժամանակավոր կացության կարգավիճակ տրամադրելը, ըստ որոշ փորձագետների, Ռուսաստանի արձագանքն է ապրիլյան քառօրյա պատերազմի հանգամանքները քննող հանձնաժողովին, Քոչարյանը հավաստիացրեց. «Ոչ մի կապ չի կարող լինել: Պարզապես դավադրության տեսություններով ոգևորված փորձագետները երևի իրենց հերթական պատկերացումներն են ներկայացրել վ: Դա նույնիսկ դավադրության տեսությունից էլ շատ հեռու է, որովհետև Միհրան Պողոսյանն այն մարդը չէ, որ Ռուսաստանն էլ գնա այդպիսի գործարքի: Վաղ, թե ուշ Միհրան Պողոսյանը սահմանված իրավական ճանապարհով պետք է գա և ներկայանա մեր նախաքննական մարմնին, պատասխանի նրանց հարցերին ու փորձի պաշտպանվել մեր արդարադատության համակարգում, որի փոփոխությունների թափանիվը նոր է թափ ստանում: Մենք մտահոգվելու բան չունենք: Ժամանակի խնդիր է: Ու ոչ միայն Միհրան Պողոսյանը, բոլոր նրանք, ովքեր ժամանակից շուտ Հայաստանը լքեցին, խուսափելով արդարադատությունից, նրանք դատապարտված են վերադառնալ կամ ամբողջ կյանքում լինել փախուստի մեջ»:

Եզրափակելով խոսքը` Անդրանիկ Քոչարյանը նաև անդրադարձավ նախկին գերագույն գլխավոր հրամանատարի` Սերժ Սարգսյանի` հանձնաժողովի նիստերին ներկա լինելուն: «Մենք կաշկանդված չենք ու որևէ սահմանափակում չենք դնում: Եթե անհրաժեշտ լինի, Հայաստանից դուրս գտնվող շատերին, որոնք կարող են մեզ օգտակար լինել, մենք անպայման կդիմենք»,- հավաստիացրեց նա: