ՔԿ նախագահի տեղակալները և ԵԱՀԿ փորձագիտական խմբի ներկայացուցիչները քննարկել են կոռուպցիայի դեմ պայքարում համագործակցության հարցեր

ՀՀ քննչական կոմիտեի նախագահի տեղակալներ Արման Պողոսյանն ու Սամվել Ավետիսյանը մայիսի 29-ին ընդունել են Եվրոպայում անվտանգության և համագործակցության կազմակերպության (ԵԱՀԿ) փորձագիտական խմբի` Անդրեյ Մունտեանի գլխավորած պատվիրակությանը: 

Ողջունելով հյուրերին՝ Արման Պողոսյանը հավաստիացրել է, որ կոմիտեն պատրաստակամ է արդյունավետ համագործակցություն ունենալ փորձագիտական խմբի հետ: 

ՀՀ քննչական կոմիտեի տեղեկատվության և հասարակայնության  հետ կապերի բաժնից տեղեկացնում են՝ ՔԿ նախագահի տեղակալն ընդգծել է, որ կոռուպցիոն բնույթի հանցագործությունները գտնվում են Քննչական կոմիտեի ղեկավարության անմիջական ուշադրության կենտրոնում:

Հանդիպման ընթացքում կողմերը անդրադարձել են Հայաստանում կոռուպցիայի դեմ պայքարի ոլորտում համագործակցության խորացմանն ու հակակոռուպցիոն մասնագիտացված իրավապահ մարմին ստեղծելու գործընթացին:

ԵԱՀԿ փորձագիտական խումբը պատրաստակամություն է հայտնել օժանդակելու Հայաստանին՝ գերակա ուղղություններով առաջընթաց գրանցելու հարցում: