Դատավոր Ազարյանի գրագողությունը հաստատելուց հետո էլ նա չի զրկվի գիտական աստիճանից. ԲՈԿ նախագահ

Բարձրագույն որակավորման կոմիտեի նախագահ Սմբատ Գոգյանին այսօր խորհրդարանում լրագրողները հարց ուղղեցին` ո՞վ է եղել այն քաղաքացին, որը հետաքրքրվել է` դատավոր Ալեքսանդր Ազարյանի աշխատանքը գողացվա՞ծ է, թե՞ ոչ:

Ի պատասխան` նա ասաց, որ ինքը երբեք անուններ չի հնչեցրել, ու դա նույնիսկ այն ժամանակ, երբ հայտարարել է, որ խնդիրներ կան որոշ ռեկտորների դոկտորի և պրոֆեսորի գիտական աստիճան ստանալու հարցերում:

«Դատավոր Ազարյանի  ատենախոսությունը 2 այլ ատենախոսությունների հետ ունի տեքստի համընկնում: Դրանցից մեկը պաշտպանվել է նրանից առաջ, մյուսը՝ հետո: 15 էջից ավելի համընկնում է եղել: Այդ 15 էջը համընկել է Վազգեն Ռշտունու և Տիգրան Նահապետյանի ներկայացրած աշխատանքների հետ»,- հայտնեց Գոգյանը:

«Ալեքսանդր Ազարյանը կզրկվի՞ գիտական աստճանից»,- հետաքրքրվեցին լրագրողները: Նա բացասական պատասխան տվեց: «Եթե անգամ ապացուցվի, որ աշխատանքը գրագողության տարրեր ունի, նա չի կարող զրկվել աստիճանից, որովհետև դրա համար համապատասխան մեխանիզմներ չկան»,- պարզաբանեց Գոգյանը` հավելելով, որ գիտական աստիճանից պետք է զրկվի ոչ միայն գրագողը, այլ նաև գիտական նորույթ չներկայացնողը, որը, օրինակ, չեխերեն ինչ-որ ատենախոսություն կարդալով, մի քիչ թարգմանում է  և ասում` իմն է:

ԲՈԿ նախագահն ասաց նաև, որ այսօր էլ են ատենախոսություններ մերժում, ավելին` բարձրաստիճան պաշտոնյայի ազգականի ատենախոսություն են մերժել, պարզապես այդ մասին չեն բարձրաձայնում, որ թեման չշահարկվի: