«Բահարիտա Ջանատա»-ի մեծ հաղթանակը. Մոդին վերընտրվել է Հնդկաստանի վարչապետի պաշտոնում

Հնդկաստանի գործող վարչապետ Նարենդա Մոդի գլխավորած «Բահարիտա Ջանատա» կուսակցությունը մեծ հաղթանակ է տարել Հնդկաստանի խորհրդարանի ստորին պալատի՝ Լոկ Սաբխեի ընտրություններում. հաղորդում է BBC-ն:

Հնդկաստանի կենտրոնական ընտրական հանձնաժողովի հրապարակած տվյալների համաձայն, մեկ ամսվա ընթացքում եւ յոթ փուլով անցկացված ընտրությունների արդյունքում Հնդկաստանի իշխող կուսակցությունը ստացել է խորհրդարանի 543 տեղերից 303-ը:

«Բահարիտա Ջանատա»-ի հիմնական մրցակիցը՝ Ռահուլ Գանդիի գլխավորած «Հնդկական ազգային Կոնգրես»-ը, ստացել է 52 տեղ:

Ընդհանուր առմամբ,  «Բահարիտա Ջանատա»-ի առանցքի շուրջ ձեւավորված «Ազգային ժողովրդավարական միություն»-ը խորհրդարանում կունենա շուրջ 340 տեղ, իսկ «Հնդկական ազգային Կոնգրես»-ի գլխավորած «Միավորված առաջադեմ միություն»-ը՝ շուրջ 90 տեղ:

Հնդկաստանի խորհրդարանական ընտրությունները համարվում են ամենախոշոր ընտրություններն աշխարհում: Այս տարի, ընդհանուր առմամբ, ընտրություններին մասնակցել է ավելի քան 900 մլն քաղաքացի: Քվեարկության ընթացքում ամբողջ երկրում գործել է ավելի քան 1 մլն ընտրատեղամաս: