Հոլանդիան զգուշացրել է իր քաղաքացիներին` զերծ մնալ Թուրքիա այցելություններից

Հոլանդիայի արտաքին գործերի նախարարությունը զգուշացրել է երկրի քաղաքացիներին` հնարավորության դեպքում զերծ մնալ Թուրքիա այցելություններից. հայտնում է Euronews-ի թուրքական ծառայությունը:

Նախարարության պաշտոնական կայքում տեղ գտած հայտարարության մեջ մասնավորապես նշվում է. «Թուրքիայի ահաբեկչական կազմակերպություններին անդամակցելու կասկածանքով` այդ երկրի օդանավակայանում ձեր բջջայինները կամ էլ այլ էլեկտրոնային սարքավորումներ ոստիկանության կողմից կարող են ստուգման ենթարկվել:

Թուրքիայից դուրս ձեր արած արտահայտությունների պատճառով այնտեղ կարող եք հարցաքննության ենթարկվել, ներառյալ` սոցցանցերում ձեր գրառումների համար: Ճանապարհորդություն իրականացնելիս խնդրում ենք սրանք նկատի ունեցեք»:

Հոլանդիայի ԱԳՆ-ի այս հայտարարությունը եղել է այն բանից հետո, երբ ֆրանսիական Լիոնի 1 համալսարանի մաթեմատիկայի ամբիոնի դասախոս Թունա Ալթընելը ձերբակալվել է Թուրքիայում: Նա մեղադրվում է Լիոնում անցկացված հանրային քննարկման ժամանակ իբր ահաբեկչական քարոզ անելու համար: