Այրված օդանավի անձնակազմը պատմել է կատարվածի մանրամասները

«Աերոֆլոտ» ավիաընկերության` «Շերեմետևո»-ում կոշտ վայրեջքից անմիջապես հետո այրված Sukhoi Superjet 100 օդանավի անձնակազմի անդամները Россия 24-ին պատմել են վթարի մանրամասները. հայտնում է РИА Новости-ն:

Այսպես` բորտուղեկցորդուհի Տատյանա Կասատկինան ասել է, որ թռիչքց հետո օդանավը հայտնվել է սև ամպերի մեջ, տեղացել է հորդառատ անձրև: «Այդ պահին լսվեց թույլ գմփոց: Ամեն ինչ շատ արագ կատարվեց»,- պատմել  է նա:

Անձնակազմի հրամանատար Դենիս Եվդոկիմովը պատմել է հեռուստաալիքին, որ կայծակի հարվածի հետևանքով ռադիոկապը կորել է, և օդաչուները ստիպված են եղել անցնել օդանավի  վթարային կառավարման ռեժիմին:

Հիշեցնենք, որ ՌԴ ՔԿ-ն դիտարկում է վթարի մի քանի վարկածներ: Դրանց թվում են` օդաչուների, կարգավարների, օդանավի տեխնիկական զննումն իրականացնող անձանց ոչ բավարար պատրաստվածություն, օդանավի անսարքություն, անբարենպաստ եղանակային պայմաններ:

Հիշեցնենք, որ երեկ «Աերոֆլոտ»-ի Sukhoi Superjet 100 օդանավը, որը Մոսկվայից ուղևորվում է Մուրմանսկ, շտապ վերադարձել է «Շերեմետևո»: Եղանակային վատ պայմանների հետևանքով վայրէջքը կոշտ է եղել, օդանավը վնասվել է, շարժիչները սկսել են այրվել: Վերջին տվյալներով` զոհվել է 41 մարդ: