ԱՄՆ-ն մեղադրել է Չինաստանին մեկ միլիոն մուսուլմանների «համակենտրոնացման ճամբարներում» պահելու մեջ

Միացյալ Նահանգները մեղադրել է Չինաստանին ավելի քան մեկ միլիոն մուսուլմանների «համակենտրոնացման ճամբարներում» պահելու մեջ: Այս մասին հայտնում է The Guardian-ը։

Նշվում է, որ սա Վաշինգտոնի ամենակտրուկ հայտարարություններից մեկն է, որը դատապարտում է Պեկինի` ազգային փոքրամասնությունների նկատմամբ վատ վերաբերմունքը։

«Չինացիներն իրենց անվտանգության ուժերն օգտագործում են չինացի մուսուլմաններին համակենտրոնացման ճամբարներում զանգվածաբար պահելու նպատակով»,-  Պենտագոնում ճեպազրույցի ժամանակ ասել է ԱՄՆ պաշտպանության նախարարության ասիական քաղաքականության պատասխանատու Ռենդալ Շրիվերը` հավելելով, որ այնտեղ պահվող մուսուլմանների թիվը կարող է հասնել 3 միլիոնի:

Պարբերականի կարծիքով` Ռենդալ Շրիվերի հայտարարությունները կարող են մեծացնել Չինաստանի հետ լարվածությունը, որը շատ զգայուն է միջազգային քննադատության նկատմամբ և «համակենտրոնացման ճամբարները» որպես կրթական կենտրոններ է ներկայացնում, որոնց հիմնական նպատակը իսլամական ծայրահեղականության սպառնալիքի կանխումն է։