«Այո»-ի և «Ոչ»-ի ճամբարներում ամեն ինչ մնաց նույնը. Լևոն Մարտիրոսյան

ՀՀԿ խմբակցության պատգամավոր Լևոն Մարտիրոսյանն այսօր լրագրողներին հայտնեց, որ ինքը, որպես սահմանադրական իրավունքի մասնագետ, պարզապես չի կարող չնկատել, որ  քարոզարշավի ընթացքում «Ոչ»-ի ճակատի բազմաթիվ փորձերը, որոնք նպատակ ունեին համոզել, որ պետք է դեմ քվեարկել սահմանադրական բարեփոխումներին, ընդհանրապես համոզիչ չէին: Նրա խոսքով`սահմանադրական բարեփոխումների փաթեթը, որպես փաստաթուղթ, բավական լավ մշակված է:

«Եթե փորձենք այս օրերի ընթացքում տեղի ունեցած քարոզարշավն ամփոփել, կհասկանանք, որ այդ ընթացքում որևէ բան չփոխվեց: Ամեն ինչ մնաց նույնը «Այո»-ի և «Ոչ»-ի ճամբարներում: Եթե բոլոր քաղաքական նախընտրությունները մի կողմ դնենք, սահմանադրական բարեփոխումների  փաթեթը շատ լավն է»,- ասաց Մարտիրոսյանը:

Նա անդրադարձավ նաև այն դիտարկմանը, թե Սերժ Սարգսյանի` նախօրեին  մի քանի  հեռուստաընկերություններին տված հարցազրույցից պարզ չդարձավ` ի վերջո, նա իր ապագան քաղաքականության մեջ տեսնո՞ւմ է, թե՞ ոչ: Մարտիրոսյանը նշեց, որ ինչպես այդ հարցազրույցի ընթացքում Սերժ Սարգսյանն է ասել, որ չի մեկնաբանելու հանրապետության նախորդ երկու նախագահների ասածները, այնպես էլ ինքը չի մեկնաբանում Սերժ Սարգսյանի ասածները: