Ճապոնիայի կայսրն ու կայսրուհին այսօր վերջին անգամ են պաշտոնապես դուրս եկել հանրության առջև որպես թագավորող զույգ

Ճապոնիայի Ակիհիտո կայսրը և նրա կինը` Միտիկո կայսրուհին, այսօր վերջին անգամ են պաշտոնապես դուրս եկել հանրության առջև որպես թագավորող զույգ. ապրիլի 30-ին  միապետը հրաժարվում է գահից: Այս մասին տեղեկացնում է The Japan Times-ը:

Թագավորական զույգը  մասնակցել է շրջակա միջավայրի պաշտպանության ակտիվիստների և գիտնականների՝ Տոկիոյում կայացած պարգևատրման միջոցառմանը:

Ճապոնիայի 85-ամյա կայսրը և 84-ամյա կայսրուհին մինչև ապրիլի վերջը կվայելեն իրենց թագավորական հանգիստը մայրաքաղաք Տոկիոյի կենտրոնում գտնվող` իրենց պատկանող պալատական համալիրում: Հենց այստեղ էլ նրանք ապրիլի 30-ին կմասնակցեն գահից հրաժարման պաշտոնական արարողությանը, որի ժամանակ իշխանության երեք ճյուղերի՝ կառավարության, խորհրդարանի և  երկրի Գերագույն դատարանի ղեկավարների ներկայությամբ ներկայիս կայսրը կարտասանի հրաժեշտի ճառը և կհրաժարվի թագավորական գահից:

Արդեն մայիսի 1-ին Տոկիոյում կկայանա Ակիհիտոյի 59-ամյա ավագ որդու՝ ներկայիս գահաժառանգ արքայազն Նարուհիտոյի գահակալության հանդիսավոր արարողությունը, որի հետ կապված հիմնական միջոցառումները տեղի կունենան հոկտեմբերին: